Investimet e individëve në titujt e qeverisë shqiptare pësuan rënie për të dytin vit radhazi në 2024. Të dhënat e Autoritetit të Mbikëqyrjes Financiare (AMF) tregojnë se për vitin e kaluar blerjet e individëve në tregun primar të bonove dhe obligacioneve ranë në 28.5 miliardë lekë, në rënie me 23.9% krahasuar me vitin 2023. Rënie u shënua edhe në numrin e transaksioneve, që zbriti në 9654, me një rënie vjetore prej 29.3%.
Sipas llojit të instrumenteve financiare, peshën kryesore vazhdon ta mbajë investimit në bono thesari. Shifrat e AMF-së tregojnë se vlera e blerjeve të bonove në tregun primar zbriti në 22.7 miliardë lekë, me një rënie vjetore prej 23.2%. Ndërkohë, investimi në obligacione u tkurr në 5.8 miliardë lekë, 26.3% më pak krahasuar me vitin 2023.
Të dhënat e mësipërme u referohen transaksioneve të kryera nëpërmjet ndërmjetësve financiarë të licencuar nga AMF, kryesisht bankave tregtare. Megjithatë, investimi në bono thesari mund të kryhet edhe nëpërmjet sporteleve të posaçme të Bankës së Shqipërisë.
Sipas të dhënave më të fundit të Ministrisë së Financave, në fund të 9-mujorit 2024 vlerësohej se individët zotëronin rreth 20.2% të totalit të borxhit të brendshëm publik.
Rënia e investimit të individëve në bono dhe obligacione vlerësohet të ketë ardhur kryesisht si rezultat i uljes së ndjeshme të yield-eve vitin e kaluar.
Ulja e normës bazë të interesit nga Banka e Shqipërisë, gjendja likuide e tregut financiar dhe reduktimi i perceptimit të rrezikut sollën një rënie të yield-eve për të gjitha instrumentet e borxhit të qeverisë shqiptare gjatë vitit 2024.
Megjithatë, sipas të dhënave nga AMF, një rritje e lehtë u regjistrua në investimet e individëve në tregun dytësor. Blerjet e tyre nga portofolet e ndërmjetësve financiarë u rritën në 4.7 miliardë lekë, 7.7% më shumë krahasuar me një vit më parë.
Zhvendosja e interesit të individëve nga tregu primar në atë sekondar duket se shpjegohet pikërisht me kthimet më të mira që ofrojnë instrumentet e emetuara nga qeveria në vitet e mëparshme, veçanërisht gjatë vitit 2022. Rënia e yield-eve i ka bërë këto instrumente më tërheqëse dhe ka shtuar investimet e individëve në to.
Kjo tregon një njohje më të mirë të alternativave që ofron tregu financiar nga një segment i caktuar i investitorëve individë. Sidoqoftë, numri i investitorëve që ka kryer investime në tregun dytësor ngelet relativisht i vogël (1632 transaksione gjithsej) dhe në rënie me 15% krahasuar me vitin 2023. Në Shqipëri veprojnë aktualisht dhjetë shoqëri komisionere që mundësojnë investimin në titujt e qeverisë shqiptare, prej të cilave nëntë janë banka tregtare. /E.Shehu
Postimi ” Investimet e individëve në bono dhe obligacione ranë për të dytin vit radhazi në 2024 ” eshte marre nga Revista Monitor.
