Pallati i Sporteve “Tamara Nikolla” në Korçë do t’i nënshtrohet transformimit përmes një investimi të kontraktuar nga Fondi Shqiptar i Zhvillimit, si pjesë e projektit që synon të transformojë asetet publike.
Fondi bëri të ditur se tashmë ka lidhur kontratën me fituesin Xhengo SHPK me një ofertë 232 mln lekë apo 2.3 mln euro në funksion të transformimit të ndërtesës aktuale.
Objekti i Pallatit të Sportit “Tamara Nikolla” ndodhet në zonën sportive të Qytetit të Korçës dhe ka si funksion aktivitete sportive për lojëra me dorë si basketboll dhe volejboll.
Koncepti i zgjidhjes funksionale i referohet projektit të kompleksit për Stadiumin e Korçës, i propozuar dhe i shpallur fitues studio CEBRA | ARUP | UNO Architects.
Ndërtesa ekzistuese e pallatit të sportit është projektuar në vitin 1973 nga Instituti i Studimeve e Projektimeve të Urbanistikës dhe Arkitekturës.
Ndërhyrjet në objektin ekzistues janë kryesisht ndërhyrje që lidhen me zgjidhjen funksionale sipas detyrës së projektimit, por dhe standardeve ndërkombëtare si dhe ndërhyrje në fasadë. Ndërhyrjet funksionale janë kryesisht në pjesën hyrjes, ku në pjesën e hollit riformulohet hapësira duke krijuar hapësirat si: Muze 82.7 m2 ; Bar-kafe 45 m2 ; Dyqan 20 m2 ; Holl 66.2 m2 ; Shtesë një kat, zyra dhe ambiente të tjera ndihmëse 380 m2 ; Ashensor ; Rampa.
Nyjet higjeno sanitare, dhomat e zhveshjes, dushet, depot, magazinat dhe zyrat mbeten me të njëjtën sipërfaqe, por do të kryhen punime të brendshme dhe pajisjet do të zëvendësohen. Ndërhyrjet në fasadë janë kryesisht në fasadën jug-lindore e cila është fasada kryesore. Në të prishen muret në katin përdhe dhe vendosen vetrata xhami gjatë gjithë gjatësisë së hapave konstruktiv. Ndërsa në dy fasadat anësore shtohen hyrje-daljet në katin përdhe, nga dy të tilla propozohen të jenë gjashtë në secilën anë.
Fasada e pasme për të pasur të njëjtë gjuhë arkitektonike me tërësinë e objektit, pastrohet nga kornizat dhe veshjet e realizuar me ndërhyrje të vazhdueshme gjatë viteve. Zgjedhja e ngjyrave dhe teknikave reflekton arkitekturën re të qytetit të Korçës, duke integruar një lidhjeje vizuale mes qytetit dhe pallatit të sportit dhe hotelit.
Postimi ” Investimet në asetet publike, FSHZH lidh kontratën 2.3 mln euro për pallatin e sportit në Korçë ” eshte marre nga Revista Monitor.
