Intervistë me Anxhela Brahimaj, Menaxhere e Përgjithshme e EMANTE sh.p.k
Që nga viti 2017, kur vendi miratoi për herë të parë një kuadër për energjinë e rinovueshme, ecuria e këtij segmenti ka qenë në rritje të vazhdueshme, por kërcimi real i saj u pa në kulmin e krizës së energjisë në vitin 2022.
Rritja e shpejtë e investimeve në impiante fotovoltaikë me projekte në shkallë të madhe apo të vogël zbatimi, ka nxitur edhe zinxhirin e industrive mbështetëse të saj.
Një nga këto raste është EMANTE sh.p.k. Anxhela Brahimaj, Menaxhere e Përgjithshme e kompanisë, thotë sesi rritja e këtij sektori nxiti orientimin drejt prodhimit të mbajtësve të paneleve diellorë.
Kompania prodhon strukturat që instalohen në tokë, të realizuara me çelik Magnelis® duke ofruar qëndrueshmëri afatgjatë, rezistencë ndaj korrozionit dhe fleksibilitet në varësi të terrenit. Përveç bashkëpunimeve me kompani brenda vendit, një peshë të rëndësishme po marrin edhe eksportet.
Ju prodhoni struktura për vendosjen e impianteve fotovoltaikë. Si ka ardhur kërkesa nga viti në vit për këto struktura duke pasur zgjerimin e investimeve në energjinë e rinovueshme?
Kërkesa për struktura mbajtëse të impianteve fotovoltaike ka shënuar rritje të vazhdueshme vitet e fundit, e nxitur nga zgjerimi i investimeve në energji të rinovueshme në Shqipëri dhe eksportet drejt tregjeve të jashtme.
Fillimisht, projektet ishin kryesisht pilot ose të vogla, ndërsa vitet e fundit dominon ndërtimi i impianteve më të mëdha. Kjo ka rritur jo vetëm volumet e kërkesës, por edhe standardet teknike për struktura më të forta, të certifikuara dhe të përshtatshme për kushte klimatike të ndryshme.
Në sa projekte keni qenë pjesëmarrës dhe sa e lehtë apo e vështirë është të hysh në treg përballë konkurrencës që mund të vijë nga importi?
Kompania ka marrë pjesë në një numër të konsiderueshëm projektesh fotovoltaikë, kryesisht në instalime në tokë. Tregu vendas karakterizohet nga konkurrenca e importit me çmime të favorshme, por avantazhi kryesor i prodhimit lokal siç jemi ne qëndron te fleksibiliteti, koha më e shkurtër e furnizimit, përshtatja sipas projektit dhe mbështetja teknike gjatë zbatimit.
Cilat janë sfidat kryesore që hasni në prodhimin dhe furnizimin e strukturave fotovoltaike (logjistika, kosto lëndësh të para, standardet teknike)?
Sfidat kryesore lidhen me lëndët e para, sidomos çelikun, të ndikuara nga luhatjet ndërkombëtare, logjistika për projekte voluminoze me afate të shkurtra dorëzimi dhe respektimi i standardeve teknike dhe certifikimeve për ngarkesa erë/borë dhe jetëgjatësi në mjedise korrozive.
Përveç projekteve në vend, si ka qenë zgjerimi apo interesi për këtë segment të produkteve tuaja jashtë vendit dhe ku janë tregjet kryesore?
Interesi për eksport po rritet, veçanërisht në rajon, ku kërkohet balanca mes cilësisë europiane dhe kostos konkurruese. Tregjet kryesore janë Italia, Maqedonia e Veriut dhe Mali i Zi, vende në të cilat ka rritje të ndjeshme të investimeve në fotovoltaikë.
Nga ana tjetër, eksporti në tërësi shihet si drejtim strategjik për zgjerim të qëndrueshëm.
Sa u takon projekteve në vend, ne kemi bashkëpunuar me një sërë kompanish që kanë zhvilluar projekte me kapacitet të konsiderueshëm të instaluar si: 74 MW Nova Solar në Seman të Fierit dhe 101.5 MW Info-Telecom në Ballsh të Fierit, si dhe projekte më të vogla nga 2.4 MW, 1 MW, 500 kWp dhe 200 kWp për kompani të ndryshme.
A shihni mundësinë për integrim vertikal të biznesit që të prodhoni edhe pajisje të tjera shtesë që lidhen me këtë sektor?
Ekziston gjithashtu një potencial i konsiderueshëm për integrim vertikal, duke zgjeruar ofertën me aksesorë montimi, sisteme fiksimi dhe struktura speciale për aplikime të veçanta, gjë që rrit vlerën e shtuar dhe plotëson më shumë shërbimin që ofrojmë për klientët.
Lexoni edhe:
Investitorët shqiptarë ndjekin diellin, biznesi 1.5 miliardë euro
Postimi ” “Investimet në fotovoltaikë kanë rritur kërkesën për mbajtëse, ja avantazhi përballë importit” ” eshte marre nga Revista Monitor.
