Studimi i gazifikimit të zonës së Korçës është gati, ndërkohë që është drejt përfundimit dhe studimi i tubacionit lidhës të TAP-it me TEC-in e Vlorës. Teksa mori pjesë në samitin e 10-të të Korridorit Jugor të Gazit, në Azerbajxhan kryeministri Edi Rama bëri me dije ecurinë e projekteve të përbashkëta në fushën e energjisë mes 2 vendeve, si dhe rëndësinë për investimeve në këtë fushë.
“Aktualisht në Shqipëri po kërkojmë të ecim përpara drejt projektit të gazifikimit të vendit dhe falë mbështetjes së presidentit Aliev këtë proces gazifikimi duke shkuar kundër asaj që në traditën tonë historike që na ishte privuar”, – tha Rama.
Ndërkaq, sipas ministres së Infrastrukturës dhe Energjisë, Belinda Balluku e cila gjithashtu ishte e pranishme në samit, investimet në sektorin e gazit synojnë diversifikimin e burimeve të prodhimit të energjisë, duke rritur sigurinë energjetike edhe në rajon.
“Sot flitet gjerësisht për një axhendë të gjelbër që Shqipëria sigurisht kryeson ashtu si dhe vendet skandinave duke qenë se prodhimi jonë është i bazuar 100% mbi burimet e rinovueshme. Por nga ana tjetër krijimi i infrastrukturës së gazit dhe krijimi i një mundësie për të pasur burime alternative sigurisht do ti jepte Shqipërisë, por edhe rajonit një siguri më të lartë energjetike”, – tha Balluku.
Paralelisht, sipas Ramës interes paraqet edhe hidrogjeni, si një nga teknologjitë e të ardhmes.
Për ne, investimet në energjinë e qëndrueshme dhe të ripërtërishme janë pa asnjë dyshim thelbësore. Vitet e fundit ato e kanë shndërruar Shqipërinë në një vend të natyrshëm të tranzicionit të gjelbër e të inovacionit në sektorin energjetik. Në këtë drejtim nisja e dialogjeve për hidrogjenin e gjelbër, në kontestin e Korridorit Jugor të gazit është shumë e rëndësishme dhe përmirëson edhe njëherë vlerën e kësaj nisme vizionare”, – tha Rama.
Në kuadër të bashkëpunimit me Azerbajxhanin, u nënshkrua edhe marrëveshja për heqjen e vizave për qytetarët shqiptarë që udhëtojnë drejt këtij shteti, duke hapur mundësi të reja për turizëm, zhvillim ekonomik dhe bashkëpunim mes dy vendeve.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
