Investimet e përbashkëta nga buxheti i shtetit dhe ato nga donatorët në projekte që lidhen me ujësjellës-kanalizimet arritën 126 milionë euro në vitin që lamë pas.
Enti Rregullator i Ujit raportoi se pjesa më e madhe e tyre I takon fondeve të buxhetit.
“Referuar të dhënave nga Agjencia Kombëtare e Ujësjellës-Kanalizimeve ( AKUK) për vitin 2024, në total investimet për vitin 2024 për investime në sektorin UK nga buxheti i shtetit dhe donatorët janë alokuar fondet në vlerën e rreth 12.9 miliardë lekë (ose rreth 129.7 milionë euro) dhe janë disbursuar 12.6 miliardë lekë (ose rreth 126.5 milionë euro), pra rreth 98% të planifikuara”, thuhet në raport.
Pjesa më e madhe e këtyre parave vijnë nga buxheti i shtetit ndërkohë që një përqindje më e vogël vijnë nga donatorët në projekte që kanë vite që zhvillohen.
“Nga totali i investimeve prej 12.6 miliardë lekësh, janë financuar nga Qeveria Shqiptare 11,179,835,619 lekë (ose rreth 99% të totalit), si edhe 1,473,559,055 lekë nga donatorët e huaj (rreth 12% të totalit).
Pjesa më e madhe e financimit në vitin 2024 ka qenë për objektet në vazhdim 8.577 miliardë lekë (rreth 85.7 milionë euro) dhe vetëm 1.988 miliardë lekë (rreth 19.8 milionë euro) janë financuar për objekte të reja me financim të brendshëm nga buxheti i shtetit.
Investimet me financime të huaja kanë qenë kryesisht nga KfW në vazhdimësi të Programit të Infrastrukturës Bashkiake IV dhe V, Banka Botërore dhe SIDA, nga të cilat është disbursuar (89%) e vlerës së fondit të planifikuar” thuhet në raport.
Vlera e disbursuar nga investimet e huaja ka qenë vetëm për objektet në vazhdim. Konkretisht nga investimet për mbulimin me kanalizime që është një nga elementët e rëndësishëm që kanë ujësjellësit për 2024-ën ka një përmirësim me 1.4 për qind në raport me vitin paraardhës.
“Përmirësimi i këtij treguesi vjen si rezultat i rritjes së popullsisë me shërbimin e KUN me rreth 97,000 banorë.
Në sektor janë akoma rreth 87 mijë klientë, të cilët e realizojnë grumbullimin e ujërave të ndotura nëpërmjet gropave septike, gjë që tregon nevojën e rritjes së vëmendjes për investime në drejtim të kanalizimeve”, vlerëson ERRU.
Postimi ” Investimet në ujësjellës-kanalizime arritën 126 milionë euro në 2024 ” eshte marre nga Revista Monitor.
