Ministria e Financave ka bërë të ditur se prindërit që nuk kanë marrë email për verifikim, nuk janë të obliguar të kryejnë verifikime shtesë për të vazhduar të përfitojnë nga shtesat për fëmijë.
Ministria e Financave ka dalë me sqarim për kërkesat për verifikime shtesë që u janë dërguar disa prindërve, në programin për shtesat për fëmijët.
MF-ja ka bërë të ditur se verifikimi shtesë është bërë për t’u siguruar se prindërit dhe fëmijët e tyre jetojnë në Kosovë.
Sipas njoftimit, kushdo që s’ka pranuar e-mail, s’ka nevojë për verifikime shtesë.
Ky proces nisi më 11 shtator. Në emailin që u ishte dërguar disa prindërve u ishte thënë se përkohësisht janë pezulluar pagesat e shtesave për fëmijë, deri kur të paraqesin dokumente për verifikim në Qendrën për Punë Sociale.
Ministria ka kërkuar nga përfituesit që në QPS të dërgojnë këto dokumente: kopjen e letërnjoftimit, një faturë të shërbimeve publike, si dhe për fëmijët nga mosha 0-6 vjeç librezën e vaksinimit, e për ata mbi 6 vjet vërtetimin nga shkolla.
Sipas njoftimit, këta prindër kanë marrë informacion përmes eKosova dhe email-eve nga Ministria e Financave, me udhëzime të qarta për të përfunduar verifikimin shtesë dhe për të riaktivizuar llogaritë e shtesave për fëmijë.
“Në kuadër të programit për shtesat për fëmijë, është një numër i caktuar i prindërve, llogaria e të cilëve është përzgjedhur për verifikim shtesë për t’u siguruar se ata dhe fëmijët e tyre jetojnë në Kosovë. Të gjithë këta prindër kanë pranuar njoftimin në eKosova dhe në email adresat e tyre, me hapat e nevojshëm për të kompletuar verifikimin shtesë dhe për të ri-aktivizuar llogarinë e shtesave për fëmijë”, thuhet në njoftim.
Nëse nuk keni marrë ndonjë njoftim nga eKosova apo email nga MFPT, nuk keni nevojë të ndërmerrni ndonjë veprim.
Programi i shtesave për fëmijë do të vazhdojë si zakonisht dhe do të merrni ndihmën financiare në llogarinë tuaj çdo muaj.
Ditë më parë, kryeministri Albin Kurti ka bërë të ditur se skema e shtesës për fëmijë është ridizajnuar. Për ata që kanë një ose dy fëmijë, Qeveria e Kosovës do të paguajë nga 20 euro shtesa për secilin, nga 10 euro sa ishte në të kaluarën.
Për ata që kanë mbi tre fëmijë, shtesat do të jenë 30 euro për secilin.
“Skemën e shtesave për nëna dhe fëmijë po e ridizajnojmë dhe me rritje të shtesave po i dyfishojmë për shumicën e nënave dhe në disa raste trefishojmë kur nëna ka tre fëmijë a më shumë. Për fëmijën e parë dhe dytë shtesat do të jenë nga 20 euro në muaj secilit, e për nënat me tre fëmijë e më shumë shtesat do jenë 30 euro në muaj për secilin fëmijë”, ka thënë Kurti.
E, ministri i Financave, Hekuran Murati, ka thënë se llogariten që për 16 vjet, aq sa e parasheh skema, familja me tre fëmijë përfiton mbi 17 mijë euro. Ai ka treguar se në skemë është edhe një nënë që ka 10 fëmijë dhe që është e vetmja me këtë numër fëmijësh në vend.
“Për fëmijën e parë është 20 euro apo 240 euro në vit, për dy fëmijë është dy herë nga 20 euro apo 480 euro dhe me fëmijën e tretë bëhet një kapërcim substancial sepse të tre shtesa bëhet 30 euro, d.m.th 90 euro për tre fëmijët. Do familje me tre fëmijë a më shumë mund të llogarisë që për tërë hapësirën e skemës për 16 vjet do përfitojë mbi 17 mijë euro”.
Sipas Ministrisë së Financave nga kjo skemë përfitojnë 400 mijë fëmijë.
Postimi ” Jetojnë jashtë Kosovës dhe marrin shtesa për fëmijë, Ministria e Financave nis verifikimin llogarive ” eshte marre nga Revista Monitor.
