Shqipëria renditet në vendin e katërt në Europë për konsumin energjisë nga burime të rinovueshme. Të dhënat raportohen nga Eurostat, sipas të cilave vendi ynë lihet pas vetëm nga Norvegjia, Suedia dhe Finlanda. Sipas Eursotat konsumi bruto i energjisë, që gjenerohet nga burime të rinovueshme për vitin 2022 në Shqipëri rezultoi në 44%.
Ndërkohë që, në vendin e parë renditet Norvegjia me gati 76% të konsumit të energjisë nga burime të rinovueshme, në vendin e dytë Suedia me 66%, ndërsa në të tretin Finlanda, me 48%. Sipas Eurostat këto vende e mbështesin konsumin e tyre kryesisht në hidro, erë dhe biokarburante të ngurta dhe të lëngshme. Ndërkohë që, vendi ynë duket se “penalizohet” nga konsumi i energjisë në transport, pasi ky sektor bazohet ende në karburantet fosile, ndryshe nga sektori elektroenergjetik, që mbështetet thuajse kryesisht në burimet ujore.
Ndërkaq, sipas Eurostat, pjesa e burimeve të rinovueshme në konsumin bruto të energjisë finale në nivel të Bashkimit Evropian arriti në 23 % në vitin 2022. Krahasuar me vitin 2021, kjo përfaqëson një rritje prej 1.1 pikë përqindjeje.
Ndërkaq, Direktiva e rishikuar për energjinë e rinovueshme ka rishikuar objektivin e BE-së për energjinë e rinovueshme për vitin 2030 nga 32% në 42.5% (me synimin për ta rritur atë në 45%). Prandaj, sipas Eurostat vendet e BE-së duhet të intensifikojnë përpjekjet e tyre për të përmbushur kolektivisht objektivin e ri të BE-së për vitin 2030, i cili kërkon rritjen e pjesës së burimeve të rinovueshme të energjisë në konsumin bruto të energjisë finale të BE-së me pothuajse 20 pikë përqindje.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
