Ndërkohë që kredia për ekonominë shqiptare po rritet me ritme të larta që prej vitit të kaluar, një ecuri të ngjashme po shfaq edhe kredia e dhënë nga bankat shqiptare për huamarrës që veprojnë jashtë vendit.
Statistikat e Bankës së Shqipërisë tregojnë se sektori bankar ka rritur ndjeshëm kreditimin jashtë gjatë vitit 2025. Në mesin e këtij viti, kredia e dhënë për huamarrës jorezidentë në Shqipëri arriti në afërsisht 64.2 miliardë lekë.
Që nga fillimi i vitit 2025, ky portofol është rritur me pothuajse 14 miliardë lekë, ose rreth 27%.
Rritja është edhe më e lartë krahasuar me të njëjtën periudhë të vitit të kaluar, me afërsisht 30% më shumë. Kredia për jorezidentët aktualisht në nivelet më të larta që prej vitit 2018.
Mbështetur në statistikat e Bankës së Shqipërisë, në fund të muajit prill huaja për jorezidentët përbën rreth 6.8% të portofolit të sektorit bankar, nga rreth 5.9% që zinte një vit më parë.
Kredia e sektorit bankar për jorezidentët pati arritur arriti nivelet më të larta në mesin e vitit 2017. Një pjesë e madhe e kredisë jashtë vendit lidhej sidomos me aktivitetin e degës së BKT në Kosovë. Pasi dega në fjalë u nda nga banka mëmë në Shqipëri, në fillim të vitit 2019, kjo kredi pësoi rënie të ndjeshme. Edhe në momentin kur kredia jashtë vendit arriti pikun, ajo ishte e kufizuar në pak banka të mëdha të sistemit.
Aktualisht, Credins Bank ka degë të saj edhe në tregun e Kosovës, që vazhdojnë të klasifikohen si pjesë e bankës mëmë në Shqipëri. Nga pikëpamja statistikore, portofoli i Credins Kosovë klasifikohet si kredi për jorezidentët, megjithëse banka ushtron aktivitet si bankë lokale në Kosovë.
Sipas Bankës së Shqipërisë, kredia për subjektet jorezidente në pjesën më të madhe është kredi e dhënë për bizneset, e dominuar kryesisht nga maturiteti afatgjatë.
Rënia e normave të interesit të Euros në tregjet e jashtme duket se ka frenuar investimet e bankave në letra me vlerë të subjekteve jorezidente.
Sipas të dhënave të Bankës së Shqipërisë, në fund të muajit qershor vlera e investimit të sektorit bankar në letra me vlerë të subjekteve jorezidente arriti në 253.9 miliardë lekë. Që nga fillimi i vitit, portofoli i letrave me vlerë të subjekteve jorezidente është tkurrur me më shuëms e 23 miliardë lekë ose 8.4%.
Vitin e kaluar, Banka Qendrore Europiane nisi uljen e normave të interesit, pas një cikli dyvjeçar në rritje. Aktualisht, norma e interesit të depozitave ditore ka zbritur në 2%, ndërsa ajo e instrumenteve bazë të rifinancimit në 2.4%. Kjo ka ulur rrjedhimisht edhe normat e interesit të euros në tregjet financiare, duke i bërë më pak tërheqëse investimet në emetimet e reja të instrumenteve të borxhit./ E.Shehu
Burimi: BSH
Postimi ” Kredia po rritet me ritme të shpejta edhe për huamarrësit nga jashtë vendit ” eshte marre nga Revista Monitor.
