Kryeministri francez Michel Barnier do të japë dorëheqjen të enjten pasi ligjvënësit e ekstremit të djathtë dhe të majtë, votuan për rrëzimin e qeverisë së tij, duke e zhytur më thellë në krizë politike ekonominë e dytë më të madhe të eurozonës.
Barnier, një politikan veteran, që u bë kryeministër tre muaj më parë, do të bëhet kryeministri me mandatin më të shkurtër në historinë moderne franceze, kur Presidenti Emmanuel Macron të miratojë dorëheqjen e tij.
Të dy patën një takim për më shumë se një orë, sipas mediave franceze, duke shtuar se Barnier tani ishte larguar nga pallati presidencial Elysee. Megjithatë, ende nuk ka konfirmim zyrtar për dorëheqjen e tij.
Çdo kryeministër i ri do të përballet me të njëjtat sfida, që çuan në rënien e Barnier-it, veçanërisht duke shtyrë miratimin e buxhetit të vitit 2025, përmes një parlamenti thellësisht të ndarë në një kohë kur Franca duhet të rregullojë financat publike të dëmtuara.
Presidenti francez Emmanuel Macron ka takuar aleatët dhe politikanë të lartë, teksa kërkon të emërojë me shpejtësi një kryeministër të ri.
Disa burime thonë se ai synon të emërojë një zëvendësues me shpejtësi, mbase përpara një ceremonie për rihapjen e Katedrales Notre-Dame të shtunën, në të cilën do të marrin pjesë presidenti i sapozgjedhur i SHBA, Donald Trump dhe udhëheqës të tjerë politikë ndërkombëtarë.
Francois Bayrou, emri i të cilit përmendet shpesh nga mediat franceze si një pasardhës i mundshëm i Barnier, do të drekojë me Macron, raportoi gazeta Le Parisien dhe media të tjera. Bayrou është një politikan veteran i qendrës dhe një aleat i ngushtë i Macron.
Ministri në largim i mbrojtjes Sebastien Lecornu përmendet gjithashtu si një kandidat i mundshëm për kryeministër.
Trazirat politike në Francë dobësojnë më tej Bashkimi Europian, që tashmë është ndikuar nga shpërthimi i qeverisë së koalicionit gjerman dhe vjen vetëm disa javë përpara se Trump të kthehet në Shtëpinë e Bardhë.
E majta e fortë dhe e djathta ekstreme e dënuan Barnier, në një votë mosbesimi të mërkurën në mbrëmje, për përpjekjen për të shtyrë miratimin e buxhetit të sigurimeve shoqërore pa votim.
“Ky është përfundimi logjik i asaj, që Franca dhe ligjvënësit e saj janë në këtë moment: një rrëmujë,” tha 75-vjeçari Paulo nga Parisi.
Macron do t’i mbajë një fjalim televiziv në orën 20:00 të enjten. Mediat franceze thanë se ai do të takohet me kreun e Asamblesë Kombëtare rreth mesditës dhe me kreun e Senatit në orën 14:00.
Macron është ‘fajtori kryesor’
Macron përshpejtoi krizën e vazhdueshme me vendimin fatkeq për të mbajtur zgjedhje të parakohshme në qershor. Ai ka një mandat deri në vitin 2027, por përballet me thirrje në rritje për të dhënë dorëheqjen.
“Fajtori kryesor për situatën aktuale është Emmanuel Macron”, tha Marine Le Pen nga Tubimi Kombëtar (Rassemblement national, RN), parti e ekstremit të djathtë.
“Shpërndarja (e parlamentit në qershor) dhe censura (e qeverisë) janë pasojë e politikave të tij dhe e ndarjes së konsiderueshme, që ekziston sot midis tij dhe francezëve.”
Një president francez nuk mund të dëbohet nga funksioni i tij, nëse dy të tretat e ligjvënësve të Gjykatës së Lartë nuk vendosin se ai ka dështuar në përmbushjen e rolit të tij, sipas një neni të Kushtetutës të papërmednur kurrë më parë.
Rreth 64% e votuesve, duan që Macron të japë dorëheqjen, sipas sondazhit Toluna Harris Interactive për transmetuesin RTL. Një shumicë e vogël votuesish miratuan rrëzimin e Barnier nga parlamenti, por shumë janë të shqetësuar për pasojat ekonomike dhe politike, tregoi sondazhi.
Sipas rregullave kushtetuese franceze, nuk mund të ketë zgjedhje të reja parlamentare përpara korrikut.
“Deri në zgjedhjet e reja të mundshme, pasiguria e vazhdueshme politike ka të ngjarë të mbajë të lartë rrezikun e aseteve franceze,” thanë analistët e SocGen. “Pasiguria politike ka të ngjarë të zvogëlojë investimet dhe shpenzimet konsumatore.”
Pasiguria politike ka shqetësuar investitorët në obligacionet dhe aksionet sovrane franceze për javë të tëra.
Obligacionet dhe aksionet franceze pësuan rritje, për shkak të rezultatit të pritur gjerësisht të votimit të mosbesimit. Megjithatë, rritja e së enjtes nuk e zvogëlon pasigurinë përpara për tregjet franceze.
Rënia e qeverisë franceze e lë vendin pa një rrugë të qartë drejt reduktimit të deficitit fiskal dhe rezultati më i mundshëm është më pak shtrëngim se sa ishte planifikuar më parë, tha agjencia e vlerësimit të kredisë Standard and Poor’s (S&P).
Agjencia rivale e vlerësimit Moody’s tha se kolapsi i qeverisë franceze ishte negativ për vlerësimin e saj të kreditit dhe shtoi rreziqet e një barre më të madhe borxhi sesa pritej më parë. / Reuters
Postimi ” Kryeministri Barnier do të japë dorëheqjen pasi kriza politike në Francë thellohet ” eshte marre nga Revista Monitor.
