Ndërsa borxhi publik i Shqipërisë është rritur me më shumë se 2 miliardë euro në dy vitet e fundit, duke kaluar kuotën e 12 miliardë eurove, shifrat tregojnë se Qeveria po preferon më shumë borxhin e dhënë nëpërmjet letrave me vlerë se sa të dalë jashtë kufijve. Një veprim i tillë është mëse i kuptueshëm duke parë klimën e tregjeve financiare ndërkombëtare, me Bankat Qendrore që kanë rritur ndjeshëm normat e interesit, për rrjedhojë edhe kostot e borxheve qeveritare.
Megjithatë kjo nuk do ta ndalojë qeverinë të emetojë këtë vit Eurobondin e radhës prej 500 milionë eurosh, në një kohë që vlera shumë të larta borxhi priten të merren edhe në tregun e brendshëm, pavarëisht rritjes së fortë që ka shënuar norma e interesave të bonove e obligacioneve. Klimë që e ka detyruar qeverinë të ndryshojë strategjinë e huamarrjes për ta zhvendosur nga borxhi i jashtëm, te borxhi i brendshëm.
Sipas të dhënave zyrtare të Ministrisë së Financave, rezulton se në vitin 2021 Qeveria ka marrë thujase 1 miliardë borxh në tregun e jashtëm. Nga 4.68 Miliardë euro në vitin 2021, borxhi i jashtëm rezulton në 5.63 miliardë euro në vitin 2022. Tendencë që ka ndyshuar rrënjësisht në vitin 2022, kur totali i borxhit të jashtëm është shtuar me vetëm rreth 20 milionë euro, për t’i lënë vendin huamarrjes në tregun e brendshëm.
Një tendencë që nisi që në vitin 2021, kur paralelisht me tregun e jashtëm, Qeveria mori edhe rreth 600 milionë euro në tregun e brendshëm. Ndërkohë që këto shifra vërehen edhe në vitin 2022, ku Qeveria mori përsëri rreth 600 milionë euro borxh në tregun e brendshëm, duke e ccuar në thuajse 1.2 miliardë euro borxhin e marrë brenda kufijve. Mbajtësit kryesorë të borxhit të brendshëm të qeverisë mbeten bankat tregtare, të cilat zotërojnë rreth 60% të borxhit të brendshëm publik. Megjithatë, një pjesë e konsiderueshme e shtesës së huamarrjes në tremujorin e fundit të vitit u përballua nga individët.
Për rrjedhojë, pjesa më e madhe e borxhit publik rezulton në fund të vitit 2022 në monedhë kombëtare, ose në total 712 miliardë lekë. Ndërkohë që pjesa tjetër prej 666 miliardë lekësh është në monedhë të huaj, kryesisht në euro. Sa i përket kohëzgjatjes, pjesa dërrmuese e këtij borxhi, ose rreth 1 triolionë rezulton me afat maturimi mbi një vit.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
