Gjatë viteve të fundit bonot e thesarit, apo obligacionet qeveritare kanë shtuar interesin e qytetarëve shqiptarë për të investuar, për shkak edhe të normës së kënaqshme të kthimit të investimit. Por, si ka qenë ecuria gjatë vitit të kaluar.
Në publikimin e Autoritetit të Mbikëqyrjes Financiare (AMF), vërehet se gjatë vitit të kaluar investimet në obligacione qeveritare përbëjnë 64.17% të aseteve të fondeve të investimeve, me një rritje prej 5.36% krahasuar me vitin paraardhës.
Në tregun e fondeve të investimeve ushtruan aktivitetin e tyre 13-të fonde investimi. Sipas analizës së të dhënave për tregun e fondeve të investimeve në fund të dhjetorit 2023 vlera neto e aseteve të fondeve, arriti rreth 50.29 miliardë lekë, me një rritje prej 4.23 miliardë lekë, ose 9.19% krahasuar me fundin e vitit 2022. Ndërkohë, numri i anëtarëve që kanë investuar në fondet e investimit arriti në 32.189, me një rritje prej 11.19% ndaj vitit paraardhës.
Por, nëse krahasojmë shifrat e katër viteve të fundit, vërejmë se ky që sapo u mbyll nuk ka qenë viti më i mirë për këtë treg, si për vlerën e aseteve, ashtu edhe për numrin e anëtarëve. Sipas të dhënave të AMF, viti 2021 shënoi një rekord me një vlerë asetesh neto të tregut prej 77,6 miliardë lekësh, ndërsa 2022-shi ishte viti me vlerën më të ulët prej rreth 40 miliardë lekësh.
E njëjta ecuri ka qenë edhe për anëtarët e fondeve të investimeve, ku viti 2021 regjistroi rreth 40 mijë anëtarë, ndërsa në 2022-shin zyrtarisht ishin afro 29 mijë anëtarë.
Ekspertët e shpjegojnë rënien e këtij tregu në vitin 2022 me rritjen e fortë të inflacionit, çka solli disa ndërhyrje të njëpasnjëshme të Bankës së Shqipërisë duke rritur normën bazë të interest. Si rrjedhojë, u zhvlerësuan kthimet nga fondet e investimeve, shoqëruar me tërheqje të shpejtë të shumë investitorëve.
Dorian Koça/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
