Qeveria ka ndryshuar rregullat dhe procedurat për ndërtimin e kapaciteteve të reja prodhuese të energjisë, duke lehtësuar kryerjen e studimeve nga investitorët e centraleve eolikë. Ministrja e Infrastrukturës dhe Energjisë, Belinda Balluku bëri me dije se periudha studimore 12 – mujore që kryhet për efektivitetin e projektit, nuk do të përllogaritet në periudhën e autorizimit paraprak që marrin këto subjekte.
“Energjia e prodhuar nga era, e cila ka nevojë për 12 muajt e parë studimorë në zonën që përzgjidhet nga entiteti, ne tashmë i kemi dhënë mundësinë që ky 12-muajsh për studimin e zonës së përzgjedhur nga subjekti që do të jetë prodhuesi i parkut eolik, të jetë e përfshirë në lejen e autorizimit paraprak, duke mos i konsumuar kështu kohën që duhet të ketë në autorizimin paraprak subjekti për të kryer të gjitha punimet e tjera që parashikohen deri në krijimin e momentit të operacioneve nga parku eolik”, – tha Balluku pas mbledhjes së qeverisë.
Paralelisht, vendimi i ri parashikon edhe kryerjen e oponencës teknike nga ana e Agjencisë Kombëtare të Burimeve Natyrore.
“Përveç të gjitha institucioneve që e ofrojnë mundësinë, siç janë universiteti apo institucione të tjera, mundësinë për të bërë oponencë teknike, tani do e këtë edhe AKBN-ja”, – tha Balluku.
Ndërkaq, një tjetër ndryshim në këtë vendim lidhet me ata qytetarë apo biznese që instalojnë panele diellore për të prodhuar vetë energjinë e nevojshme, duke lejuar lidhjen e tyre me rrjetin e transmetimit.
“Ne tashmë lejojmë dhe do të certifikojmë të gjithë ata prodhues që cilët ngrejnë kapacitete elektrike për arsye të vetëprodhimit, ta hedhin edhe në rrjetet e transmetimit, por pa kërkuar nga shteti që të kompensohen për këtë sasi të hedhur”, – tha ministrja.
Sipas të dhënave të fundit të disponueshme aktualisht numërohen 1249 vetëprodhues energjie.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
