Viti 2022 shënoi zhvillime në drejtim të licencave të dhëna për prodhimin e energjisë nga dielli dhe kapacitetit që pritet të instalohet nga ndërtimi i parqeve. Sipas të dhënave nga Enti Rregullator i Energjisë, të përpunuara nga TV , në total kapaciteli arrin në 227 MW, teksa në total janë 14 kompani që kanë mundur të licencohen në aktivitetin e prodhimit të energjisë elektrike. 140 MW është kapaciteti i parkut fotovoltaik në Karavasta, që u finalizua pas ankandit të zhvilluar nga Ministria e Infrastrukturës dhe Energjisë, ndërkohë që pjesa tjetër janë centrale kryesisht të vegjël, me kapacitet deri në 2 MW.
Përjashtim bën vetëm centrali Blue 1, që parashikohet të ketë kapacitet të instaluar prej 50 MW. Dhënia e këtyre lejeve merr një rëndësi të veçantë në drejtim të diversifikimit të burimeve të prodhimit të energjisë, duke qenë se aktualisht vendi është I varura thuajse tërësisht nga energjia ujore.
Licencat e para për prodhimin e energjisë nga dielli u dhanë në vitin 2018, teksa aktualisht centralet janë në funksion e kanë një kapacitet të instaluar prej 22 MW. Gjithsesi, përgjatë periudhës 3-vjeçare 2019-2021 nuk u dha asnjë licencë e re, ndonëse aplikimet nga sektori privat ishin të shumta.
Ndërkaq, edhe Korporata Elektroenergjetike Shqiptare, që është gjeneruesi publik i energjisë ka hedhur sytë nga dielli, por gjithsesi aktualisht në funskion është vetëm impianti në digën e Qyrsaqit, që ka një kapacitet të instaluar prej 5.1 MW. Projektet e tjerë të KESH për diversifikimin e burimeve të prodhimit të energjisë janë ende në letër.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
