Qeveria synon që brenda këtij viti të finalizojë ligjin e ri për investimet i cili synon të përditësojë legjislacionin ekzistues të investimeve me standardet ndërkombëtare si dhe të vendosë një skemë të re ligjore të unifikuar dhe konkurruese për të tërhequr investimet e reja vendase dhe të huaja.
Në projektaktet e qeverisë të parashikuara për këtë vit, hartimi ky projektligj synon të zëvendësojë ligjet ekzistuese, ku përfshihet ligji “Për investimet e huaja” dhe ligji “Për investimet strategjike në Republikën e Shqipërisë”. Ndërkohë që parashikohet të sjellë për herë të para barazi dhe mbrojtje të njëjtë si për investimet vendase dhe të huaja, si dhe krijon një mekanizëm më efikas të zgjidhjes së mosmarrëveshjeve në këtë fushë.
Në sqarimet e bëra në projektakt, thuhet se “përmirësimi i legjislacionit në fushën e investimeve sjell një klimë më të favorshme si për investimet vendase dhe të huaja, duke dhënë një efekt pozitiv në ekonominë e vendit me përfitime konkrete si: rrjedhjen e kapitalit shtesë, krijimin e vendeve të reja të punës, duke përfshirë punë të lartë e të kualifikuar, transferimin teknik dhe menaxherial të dijeve, përmirësimin e aksesit në zinxhirin e vlerave ndërkombëtare dhe rrjetet e shpërndarjes së ndërmarrjeve shumëkombëshe etj”.
Ndërsa evidentohet gjithashtu, se miratimi i projektligjit, “Për investimet” ka lindur si domosdoshmëri, pasi legjislacioni në fuqi në Republikën e Shqipërisë i jepte një mbrojtje shtesë investimeve të huaja, por jo atyre vendase, ndërkohë që një korpus i ri ligjor më vete ishte krijuar për investimet strategjike.
Risi në projektligj përbën trajtimi i një mekanizmi të shpejtë brenda pushtetit ekzekutiv për zgjidhjen e mosmarrëveshjeve që i lindin një investitori me institucionet shtetërore, duke u përpjekur kësisoj të evitohen kostot e shtuara gjyqësore apo të tjera. Ndërkohë që aktualisht ka një nisëm të depozituar në Kuvend për ndryshimin e ligjit të investimeve nga deputetja demokrate Jorida Tabaku.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
