Në gjysmën e parë të vitit, afro 12.408 të moshuar kanë lidhur pension pleqërie me Institutin e Sigurimeve Shoqërorë. Referuar të dhënave zyrtare të këtij institucioni, nga pensionistët që kanë hyrë në skemë në 6 mujorin e parë 2023, 8460 janë meshkuj dhe 3948 janë femra.
Nëse do të analizojmë sipas qarqeve, Tirana mban vendin e parë për numrin e pensioneve të reja, duke qenë se ka edhe numrin më të lartë të popullsisë, ndjekur nga Fieri, Elbasani, Vlora dhe Korça, ndërsa numri më i ulët regjistrohet në Kukës.
Por a po ecën paralel masa e pensionit që përfiton mosha e tretë me çmimet e rritura dhe shtrenjtimin e kostove të jetesës në tërësi ?
Ajo që vihet re është se masa mesatare mujore e një pensionisti për gjininë mashkullore është 16.292 lekë në muaj, ndërsa masa mesatare mujore për gjininë femërore është 13.247 lekë në muaj. Për të dy gjinitë se bashku, pensioni mesatar llogaritet në 15.315 lekë në muaj, apo rreth 1/3 e pagës minimale në shkallë vendi.
Hendeku i përfitimeve midis meshkujve dhe femrave evidentohet ndër vite, gjë që lidhet drejtpërdrejt me hendekun e pagave midis dy gjinive. Duke qenë se pensioni llogaritet në bazë të kontributeve të derdhura mbi pagën, sa më e ulët të ketë qenë ajo, aq më e vogël është vlera e përfituar.
Të dhënat më të fundit të “Institutit të Statistikave” në publikimin mbi tregun e punës për vitin 2022 tregojnë se hendeku gjinor në paga është 6.2%. Pra, e thënë ndryshe meshkujt kanë një pagë mesatare mujore bruto 6.2% më të lartë sesa femrat. Krahasuar me vitin 2021, vihet re një rritje e hendekut gjinor në paga me 1.7 pikë përqindje. Aktualisht mosha e daljes në pension për meshkujt është 65.1 vjeç, ndërsa për femrat 61.7 vjeç.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
