Sektori i bujqësisë dhe blegtorisë nuk është në ditët e tij më të mira dhe ka më shumë nevojë për vëmendje e financim në mënyrë që të garantojë të ardhura të qëndrueshme për fermerët dhe të parandalohet shpopullimi i fshatrave. Por mesa duket edhe në tre vitet e ardhshme, ky sektor nuk do të jetë prioritet në financimin me buxhet.
Referuar programit buxhetor afatmesëm 2025-2027 të botuar në Fletoren Zyrtare, buxheti për Ministrinë e Bujqësisë nga rreth 14.2 miliardë lekë që është për vitin 2024, pritet që në vlerë nominale të ketë një rritje graduale nga viti në vit dhe të shkojë në 15.3 miliardë lekë në 2027, me një kapërcim prej 1.1 miliardë lekë.
Por, nëse do ta shikojmë në raport me Prodhimin e Brendshëm Bruto, mbështetja buxhetore Ministrinë e Bujqësisë zbret nga 0.58% e PBB që është aktualisht në 0.54% të PBB në vitin 2027. Gjithashtu, projektohet në rënie edhe në raport me shpenzimet e përgjithshme të qeverisë.
Sa i takon zërave të shpenzimeve, vihet re se fondet më të mëdha janë alokuar për mbështetjen e prodhimit bujqësor dhe blegtoral, dhe parashikohen me rritje rreth 1.2 miliardë lekë në vitin 2027, në raport me 2024-ën.
Me këtë buxhet synohet të mbështeten 14.500 fermerë me subvencione në vitin 2027, dhe të rritet numri i përfituesve të skemës së naftës falas për punime të mekanizuara në bujqësi nga 31.500 përfitues në vitin 2024 në 33000 përfitues në 2027.
Ndërsa për sigurinë ushqimore dhe mbrojtjen e konsumatorit fondet buxhetore janë parashikuar në ulje përgjatë periudhës 2025-2027.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
