Nga rishikimi i buxhetit të vitit 2025 në total do të rialokohen 11,8 miliardë lekë fonde që do të shkojnë për Garancinë Sovrane për fermerët, për financimin e projekteve për Inteligjencën artificiale, për projekte që do të zbartohen nga Fondi Shqiptar i Zhvillimit etj.
Ministri i Financave Petrit Malaj gjatë shqyrtimit të Aktit Normativ “Për disa ndryshimi në ligjin “Për buxhetin e shtetit 2025” në Komisionin e Ligjeve u ndal në detajet e projekteve që do të përfitojnë nga rishpërndarja e fondeve.
“Në tërësi rishikim i buxhetit 2025, parashikon një volum të përgjithshëm të fondeve që alokohen/rialokohen, prej rreth 11,8 miliardë lekë.
Rreth 3,3 miliardë lekë janë për Agjencinë Kombëtare të Sigurisë Kibernetike për produkte e teknologjisë së Inteligjencës Artificiale.
Rreth 1,5 miliardë lekë shtesë rialokohen për projekte të reja infrastrukturore për Fondin Shqiptar të Zhvillimit.
Gjithashtu për Ministrinë e Arsimit dhe Sportit janë parashikuar rreth 318 milionë lekë shtesë për projektet e ekipeve sportive në shkolla.
Ministria e Drejtësisë do të ketë rreth 142 milionë lekë shtesë për detyrimin që ka pasur për rikonstruksionin e godinës së Institutit të Mjekësisë Ligjore.
Si dhe kemi akorduar fonde shtesë, nëpërmjet këtyre kursimeve rreth 64 milionë lekë të Ministria e Shëndetësisë dhe Mbrojtjes Sociale për blerjen e disa pajisjeve mjekësore, kryesisht skanera për strukturat universitare spitalore.
Nëpërmjet këtij Akti Normativ kemi miratuar një skeme të re Garancie Sovrane për sektorin e Bujqësisë, për një vlerë 3 miliardë lekë. Nga analiza fiskale rezulton se kjo politikë respekton kufizimet e rregullave fiskale në fuqi, pa cenuar nivelin e borxhit publik. Në hapësirën ekzistuese të borxhit publik është akomoduar vlera e kësaj garancie prej 3 miliardë lekë, e cila plotëson kërkesën për mbështetje të sektorit të bujqësisë”, tha Malaj.
Ministri i Financave Petrit Malaj tha se rialokomi i fondeve në masën 5,9 miliardë lekë është garantuar nga kursimet e shpenzimeve korente kapitale drejt prioriteteve emergjente, si siguria digjitale dhe infrastruktura. Po ashtu, fondet për projektet e teknologjisë së informacionit janë qendërzuar tek AKSHI për të rritur efikasitetin dhe unifikimin e sistemeve në administratën publike.
Malaj tha se ndryshimet në buxhet ruajnë të pandryshuar deficitin buxhetor, nivelin e planifikuar të të ardhurave dhe nivelin e borxhit publik.
Postimi ” Ministri i Financave: Nga ndryshimet në buxhet do rialokohen 120 mln euro fonde ” eshte marre nga Revista Monitor.
