Ledina Elezi/
Banka e Shqipërisë po ndërmerr hapa konkretë për adresimin e çështjeve të ndryshimeve klimatike dhe promovimin e financave të gjelbra. Në një workshop të organizuar në bashkëpunim me Qendrën mbi Ekspertizën e Tranzicionit Ekonomik nga London School of Economics, u diskutuan sfidat që sjellin ndryshimet klimatike dhe degradimi mjedisor, si dhe ndikimet që kanë këto të dyja në ekonomi dhe financë.
Zëvendësguvernatorja e Bankës së Shqipërisë, Natasha Ahmetaj, paraqiti një pasqyrë të Strategjisë së Gjelbër të Bankës së Shqipërisë, të hartuar në bashkëpunim me Bankën Botërore, e cila përcakton një plan veprimi për identifikimin dhe menaxhimin e rreziqeve të lidhura me klimën, duke siguruar kështu qëndrueshmërinë e sistemit tonë financiar.
Ajo theksoi rëndësinë e rolit të sektorit financiar për një qasje të guximshme ndaj objektivave globalë për një ekonomi dhe sisteme financiare të qëndrueshme, duke mbështetur zhvillimin teknologjik dhe inovacionin.
Gjatë takimit, u trajtuan çështje që lidhen me plotësimin e kërkesave të Agjendës 2030 të OKB si dhe ato të integrimit evropian, të tilla si hartimi i Taxonomisë dhe modelimi i matjes së ndikimit në sistemin financiar nga humbja e natyrës dhe biodiversitetit, duke përfshirë edhe mënyrën se si FinTech mund të përdoret për integrimin e ESG-së.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
