Huadhënia për bizneset gjatë tremujorit të parë të këtij viti ka shfaqur shenja të ngadalësimit. Të dhënat më të fundit nga Banka e Shqipërisë tregojnë se kjo ecuri është ndikuar nga rënia e kërkesës për kredi si pasojë e likuiditetit të shtuar të bizneseve, stabilizimit të çmimeve në ekonomi dhe rënies së pasigurisë, si edhe nga shtrëngimi i kushteve të kreditimit nga bankat. Sipas madhësisë së bizneseve vihet re ngadalësimi i kredisë për biznesin e madh, tkurrja e kredisë për biznesin e vogël dhe rritja e qëndrueshme e kredisë për biznesin e mesëm.
Sipas sektorëve të ekonomisë, kredia për sektorin e industrisë ka vijuar të tkurret, ndërsa sektorët e tjerë kanë shfaqur ngadalësim të ritmeve të rritjes. Kredia për biznese ka shfaqur ngadalësim të ndjeshëm të ritmeve të rritjes në 5.4% mesatarisht për tremujorin e parë, normë kjo e përgjysmuar krahasuar me rritjen mesatare të shënuar në 2022.
Kredia në këtë segment reflekton dhe rikthimin e sjelljes sezonale të fillimvitit në ndryshim nga një vit më parë, kur konflikti në Ukrainë dhe rritja e çmime solli një kërkesë të lartë për financimin e nevojave për likuiditet.
Sipas madhësisë së biznesit, vihet re se ngadalësimi i kredisë është ndikuar nga ngadalësim i fortë i ritmeve të rritjes së kredisë për biznesin e madh në 2.5%, nga 10.5% mesatarisht për 2022 dhe nga tkurrja e kredisë për biznesin e vogël me 5% në bazë vjetore. Ndërkohë, kredia për biznesin e mesëm ka vijuar rritjen me ritme të qëndrueshme, në rreth 16%. Këto zhvillime janë reflektuar në një zhvendosje të strukturës së kredisë së bizneseve, ku vërehet rritja e peshës së kredisë për biznesin e mesëm në 31% të portofolit dhe rënia e peshës së kredisë për biznesin e madh në 49.7% dhe atij të vogël në 19.4%.
Në harkun kohor të 4 viteve të fundit, financimi i biznesit të madh është zvogëluar me rreth 0.7 pikë përqindje, kurse i atij të vogël është ulur me rreth 4 pikë përqindje. Sipas sektorëve të ekonomisë, vihet re një ngadalësim i kreditimit në të gjithë sektorët e ekonomisë. Në veçanti në tremujorin e parë, ngadalësimi i ritmeve të rritjes është më i dukshëm në sektorët e turizmit dhe shërbimeve, ndërsa kredia për sektorin e industrisë u tkurr me norma më të larta se në tremujorin e kaluar, me rreth 8%. Nga ana tjetër, ngadalësimi i rritjes së kredisë për bizneset në sektorin e ndërtimit dhe të tregtisë ka qenë më e përmbajtur, ndërsa kredia për sektorin bujqësor ruan nivele të ulëta.
Dorian Koça /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
