125.6 mln euro është vlera e investimit në sektorin e ujësjellës – kanalizime që do të nisë në 6 bashki të vendit. Investimi do të fokusohet në zonat e Shkodrës, Lezhës, Elbasanit, Fierit, Beratit dhe Vlorës, ndërsa vlera ndahet mes një kredije prej 80 mln euro nga Kfw gjermane dhe granteve të dhëna nga Bashkimi Evropian, Zvicra dhe Gjermania.
Gjatë ceremonisë për prezantimin e “Programit të Performancës dhe Investimeve të Sektorit të Ujit – Programi V për Infrastrukturën Bashkiake”, ministrja e infratsrukturës dhe Energjisë, Belinda Balluku bëri me dije se investimet në këtë sektor pritet të rrisin furnizimin 24 orë me ujë në zonat rurale dhe ato urbane.
“Aktualisht kemi 33 zona urbane dhe 98 zona rurale, të cilat furnozohen me ujë të pijshëm të cilësisë së lartë sipas parametrave 24 orë. Ndërkohë që, me buxhetin 2024 dhe të gjitha paketat e tjera të programeve ne parashikojmë që të shtohen listën e zonave që përfitojnë ujë të pijshëm të cilësësisë së lartë 24 orë, edhe 13 zona urbane, duke e çuar numrin e tyre në 46 dhe 45 zona rurale, duke e çuar numrin në 143 zona rurale të shërbyera 24 orë me ujë, 9 prej të cilave janë zona turistike”, – tha Balluku.
Gjatë fjalës së tij, ambasadori i Bashkimit Evropian në vendin tonë tha se qëllimi i këtyre programeve është përmirësimi i cilësisë së jetës së qytetarëve.
“Objektivi ynë nuk është vetëm të pajisim vendin dhe të zhvillojmë një sistem menaxhimi të sigurt dhe të adaptueshëm për ujin, por të transformojë Shqipërinë në një shoqëri të gjelbër qarkulluese.
Mbi të gjitha mbështetja jonë është një manifestim i qartë i angazhimeve të BE-së për të përmirësuar cilësinë e jetës të qytetarëve shqiptarë, si dhe t’iu ofrojmë atyre kushte më të mira mjedisore, të afërta me standardet e Bashkimit Evropian”, – u shpreh ambasadori i BE-së në Shqipëri, Silvio Gonzato.
Programi i Performancës dhe Investimeve të Sektorit të Ujit zbatohet nga KfW.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
