Vendimin e Bankës së Shqipërisë për uljen e normës bazë me 0.25 pikë përqindje për herë të parë që nga marsi 2022, eksperti i tregjeve financiare Elvin Meka e cilëson si të arsyeshme, pasi nuk ka më pritshmëri për goditje nga inflacioni. Për tv, ai ka thënë se Banka e Shqipërisë ka marë në analizë gjithë faktorët në tregun e brendshëm, duke lehtësuar politikën monetare.
“Ky vendim vjen në një rrjedhë logjike dhe krejtësisht të arsyeshme, tashmë është e qartë se nuk kemi më pristhëmri për godotje nga ana e infalcionit dhe duket se kërkesa e brendshme fillon të shfaqi disa shenja stajacioni ose anemie, të cilat BSH natyrisht duke i analizuar dhe ka arritur në përfundimin që duhet të lehtësojë politikën monetare me qëllim për t’i paraprirë kësaj tendence të rritjes së çmimeve”- ka thënë Elvin Meka.
Në shkurt 2022, Banka e Shqipërisë filloi shtrëngimin e politikës monetare në përgjigje të rritjes së inflacionit, duke e çuar normën bazë nga 0.5% në 3.25%, me rritjen e fundit që ishte në nëntor 2023. Por tashmë, sipas ekspertit Meka, ekonomia shqiptare nuk po krijon inflacion pavarësisht rritjes së kredisë.
“Pavarësisht rritjes së qëndrueshme të kredisë në ekonomi, inflacioni që vjen nga zgjerimi i bazës monetare, nuk ka rritje. Pra, nuk po importojmë inflacion, për sa kohë kemi një rënie të dukshme të inflacionit në ekonomitë e vendeve të BE nga ne marrim shumicën e produkteve”- ka thënë eksperti Meka.
Sipas Mekës, problematika është tek konsumi i brendshëm dhe deflacioni është shumë i vështirë të diktohet. Ndërsa sa i takon kursit të këmbimit me rritjen e turizmit ai thotë:
“BSH gjatë muajit Korrik dhe 2-javshin e parë të muajit Gusht ku jemi në pikun e sezonit turistik mund të gjykojë të arsyeshme ndërhyrje të herëpashershmenë treg, jo për një objektiv për të fiksuar një kurs të caktuar të lekut kundrejt euros, pasi nuk ekziston një objektiv të shkruar për këtë qëllim, por më shumë i shërben ndoshta ruajtjes së një niveli psikologjik të këmbimit duke e mbajtur diku në 100.2-100.3-100.4, por gjithmonë pa shkelur thyerjen e kufirin 1 euro, 100 lekë”- shton Meka.
Presionet mbiçmuese të lekut sipas BSH, janë rishfaqur në tregun valutor të nxitura nga rritja e ofertës që vjen si pasojë e zgjerimit të mëtejshëm të flukseve hyrëse të turizmit.
Alida Lula /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
