Foni Monetar Ndërkombëtar i kërkon qeverisë shqiptare të jetë më e kujdesshme lidhur me rrisqet që i kanosen ekonomisë. Bordi Ekzekutiv i Fondit Monetar Ndërkombëtar (FMN) në përfundimin të konsultimeve të Nenit IV me Shqipërinë, ka rikonfirmuar qëndrimin kundër amnistisë tatimore të propozuar duke pasur parasysh rreziqet e qeverisjes dhe pastrimit të parave.
Referuar deklaratës zyrtare, FMN bënë thirrje për shtimin e përpjekjeve për të rritur transparencën dhe besueshmërinë fiskale, për të përmirësuar menaxhimin e financave publike dhe për të forcuar monitorimin dhe menaxhimin e rrezikut fiskal. Ndërsa vë theksin, te partneriteti publik-privat dhe kornizat e menaxhimit të investimeve publike, të cilat sugjerohen të përafrohen dhe të integrohen plotësisht në ciklin buxhetor.
Duke kërkuar me avancimin e reformave strukturore, FMN bënë thirrje për përparim të qëndrueshëm në reformat në drejtësi dhe antikorrupsion, duke vënë theksin tek dalja e përshpejtuar nga lista gri e pastrimit të parave FATF.
Sipas Fondit Monetar Ndërkombëtar, luftimi i informalitetit do të ndihmonte në frenimin e presioneve të emigracionit. Sa i takon rrisqeve me të cilat përballet vendi ynë, FMN shprehet se rritjet e mëtejshme të çmimeve të ushqimit dhe energjisë janë një rrezik kryesor, veçanërisht nëse ato shkaktojnë efekte më të mëdha të raundit të dytë dhe trazira sociale. Ndërkohë, theksohet se ekonomia është gjithashtu e ndjeshme ndaj kushteve të pafavorshme të motit dhe një ndryshim në rritjen e çmimeve të pasurive të paluajtshme.
Nga ana tjetër, FMN vlerëson se pas një rimëkëmbjeje të fortë në vitin 2021, ekonomia shqiptare ka ruajtur një vrull pozitiv pavarësisht tronditjes së ekonomisë globale nga lufta e Rusisë kundër Ukrainës. Rritja reale e PBB-së pritet të arrijë në 3.7 për qind në vitin 2022, si pasojë e aktivitetit të fuqishëm në turizëm, pasuri të paluajtshme dhe shërbime.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
