Britania duhet të ‘përballet me stuhinë’ e një rënieje globaletë ekonomisë. Është ky paralajmërimi i ministrit të Financave Jeremy Hunt, i cili prezantoi dhe një nga buxhetet më ‘të dhimbshëm’ në historinë moderne të vendit.
Ai gjithashtu bëri thirrje për sakrifica në përpjekje për të ulur inflacionin, i cili shënon një nivel rekord në 41 vitet e fundit, prej 11.1%.
Ministri i financave pritet të konfirmojë rritjen e pensioneve dhe ndihmat financuare për të përballuar inflacionin. Rritja e pensionit do të jetë me 18.70 paund, thënë ndryshe në 203 paund në javë.
‘Garancia’ e çmimit të energjisë, dhënë nga ish-kryeministrja britanike Liz Truss për të kufizuar faturat mesatare në 2500 paund për dy vjet, tashmë do të jetë rreth 3 mijë paund duke filluar nga prilli i vitit të ardhshëm. Ndërkohë që nuk do të përsëritet një ndihmë prej 400 paund këtë dimër.
Kryeministri Rishi Sunak, përdori veton për të rikthyer në fuqi normën më të lartë të taksave. Por nga ana tjetër ai pranoi propozimet për të ulur pragun e fillimit nga 150 mijë në 125 mijë paund. Gjithashtu do të vonohet kufiri në kostot e kujdesit social me dy vjet, me zyrtarët që parashikojnë se do të mund të kursehen 1 miliard paund vitin e ardhshëm.
Hunt konfirmoi dhe shkurtime të shpenzimeve publike që arrijnë në rreth 33 miliardë paund. Disa projekte kapitale përballen me kufizime, si për shembull ndërtimi i burgjeve. Taksa shtesë prej 25% e vendosur për fitimet e naftës dhe gazit këtë vit mund të rritet në 35% dhe ka të ngjarë të zgjatet deri në vitin 2028. Për herë të parë është vendosur akciza për automjetet elektrike.
Ministri Hunt, i cili rriti taksat me 32 miliardë paund muajin e kaluar, konfirmoi një rritje të mëtejshme të taksave prej 24 miliardë paund, duke e çuar barrën e përgjithshme tatimore në një rekord të ri të pasluftës, si pjesë e një “plani për stabilitet, rritje dhe shërbime publike”.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
