Kompensimi me kusht i pronarëve është i vetmi funksion që ka kryer Agjencia e Trajtimit të Pronave gjatë vitit 2022. Në raportin për vitin 2022, Agjencia e Trajtimit të Pronave bën me dije se ka bllokuar tërësisht procesin e kthim kompensimit të pronave për shkak të një vendimi të Gjylatës Kushtetuese të vitit 2021 i cili pezulloi ligjin. Me përjashtim të kompensimeve me kusht.
Bëhet fjalë për një formulë e miratuar që në vitin 2015, përmes së cilës pronarëve u jepet mundësia të përfitojnë menjëherë kompensimin në rast se heqin dorë nga shumë totale. Përqindja e kompensimit varion në funksion të kohës që ai jepet. Për ata pronarë që e duan menjeherë kompensimin, vlera ulet deri në 20% të totalit.
Në raport, ATP bën me dije se që prej vitit 2016, janë në total 269 subjekte që kanë pranuar të heqin dorë nga pjesa më e madhe e kompensimit në këmbim të marrjes së tij jashtë radhe. Në total për këta subjekte janë paguar me këste rreth 1.7 miliardë lekë, apo afërisht 17 milionë dollarë. Vlen për t’u përmendur, se ATP raporton që i ka kursyer buxhetit më shumë se 6.8 miliardë lekë, apo afërisht 68 milionë dollarë përmes kësaj formule.
Agjencia e Trajtimit të pronave kursen çdo vit miliona dollarë përmes kësaj formule, në një kohë që duket se vitet në vijim, shtimi i pronarëve që pranojnë këtë formulë do të jetë prioritet i saj. Në Projektbuxhetin Afatmesëm 2023-2025, parashikohet që numri i pronarëve të përfshire në këtë sekemë të rritet nga 1,600 e parashikuar për 2023, në 1,936 për 2025.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
