Pritjet e institucioneve financiare dhe bizneseve për inflacionin në të ardhmen shënuan rritje në tremujorin e tretë të vitit.
Sipas vrojtimeve periodike të kryera nga Banka e Shqipërisë, pritjet e agjentëve financiarë janë rishikuar në rritje në tremujorin e tretë, duke qëndruar rreth 0.2 pikë përqindjeje më lart kundrejt pritjeve të matura një tremujor më parë. Sipas horizonteve kohore, agjentët financiarë presin një inflacion prej 2.8% pas një viti dhe 3% pas dy dhe tre vitesh.
Edhe pritjet e bizneseve për inflacionin pas një dhe dy vitesh u rritën në tremujorin e tretë, duke arritur nivelin 3.5%.
Nga ana tjetër, pritjet e konsumatorëve u rishikuan lehtësisht për poshtë, duke qëndruar në 9.3%. nga 9.5% një tremujor më parë. Pavarësisht kësaj rënieje, inflacioni i pritur nga konsumatorët mbetet në nivele të larta.
Vetë Banka e Shqipërisë, në raportin e fundit të politikës monetare, parashikon që inflacioni pritet të kthehet në objektivin prej 3% gjatë gjysmës së parë të vitit 2026, dhe të qëndrojë pranë këtij niveli edhe gjatë tremujorëve në vijim.
Pritjet inflacioniste janë një element që mund të ndikojë në formimin e çmimeve në ekonomi. Kur mes bizneseve dhe konsumatorëve ekzistojnë pritshmëri inflacioniste të larta, gjasat janë që bizneset t’i materializojnë këto pritje në një rritje të mëtejshme të çmimeve, me qëllim për të ruajtur marzhet e tyre.
Të dhënat më të fundit të INSTAT treguan se inflacioni për muajin nëntor pësoi rënie në 2.1%, nga 2.3% që kishte qenë një muaj më parë. Inflacioni preku njëkohësisht nivelin më të ulët që prej muajit mars. Por, megjithatë, inflacioni relativisht i ulët duket të jetë kryesisht rezultat i komponentëve afatshkurtër dhe kryesisht i inflacionit të importuar.
Në raportin e politikës monetare për tremujorin e katërt të vitit, Banka e Shqipërisë nënvizonte se presionet inflacioniste nga jashtë mbeten të dobëta, të kushtëzuara nga çmimet e ulëta të lëndëve bazë në tregjet ndërkombëtare dhe nga mbiçmimi i kursit të këmbimit të Lekut.
Por, nga ana tjetër Banka e Shqipërisë thekson se presionet e brendshme inflacioniste janë forcuar, në pasqyrim të zgjerimit të aktivitetit ekonomik, kushteve të shtrënguara në tregun e punës, si dhe rritjes së çmimit të qirave.
Inflacioni bazë, që përjashton produktet me luhatshmëri të lartë, kryesisht ato ushqimore dhe energjetike, u rrit përsëri në muajin tetor dhe arriti nivelin më të lartë në dy vitet e fundit.
Sipas të dhënave nga Banka e Shqipërisë, inflacioni bazë u rrit në 3.13%, nga 3.07% që kishte qenë për shtatorin. Inflacioni bazë gjithashtu ka thelluar rritjen me bazë vjetore. Në tetorin e vitit të kaluar, inflacioni bazë kishte qenë në nivelin 2.19%.
Paralelisht me inflacionin bazë, edhe inflacioni bazë neto për tetorin u rrit në 3.5%, nga 3.4% që kishte qenë për shtatorin dhe ngelet gjithashtu në rritje krahasuar me nivelin prej 2% të një viti më parë. Inflacioni bazë neto përjashton më tej nga inflacioni edhe nëngrupet e ushqimeve të përpunuara, duke përfshirë bukën dhe drithërat.
Ndërkohë, inflacioni që përjashton të gjitha produktet ushqimore dhe energjetike për muajin tetor u rrit në 3.36%, nga 3.28% që kishte qenë në muajin shtator.
Postimi ” Pritjet e bizneseve dhe agjentëve financiarë për inflacionin janë në rritje ” eshte marre nga Revista Monitor.
