“Ne kërkojmë që të miratohet si detyrim moral dhe kushtetues minimumi jetik nga deputet.”
Në një kohë që mbështetësit e Lëvizjes Bashkë protestonin përballë duke kërkuar vendosjen me ligj të minimumit jetik, brenda sallës së Kuvendit , ministri i Financave dhe Ekonomisë Ervin Mete prezantonte para deputetëve projektligjin për pensionet private.
“Projektligji parashikon një rritje të kufirit të kontributit të anëtarit që përjashtohet nga tatimi si dhe rritje të kufirit të shpenzimeve që i njihen punëdhënësit kur kontribuon për punëmarrësit e tij. Kufiri maksimal mujor, që për qëllime të lehtësive tatimore përjashtohet nga tatimi, është deri në nivelin e pagës minimale të miratuar në shkallë vendi”, thotë Ervin Mete, ministër i Financave dhe Ekonomisë.
Ndonëse e vlerësoi pozitivisht në tërësinë e tij projektligjin, deputetja demokrate Jorida Tabaku njoftoi paraprakisht se nuk do ta votonte atë duke dhënë edhe arsyen.
“Baza e re ligjore nuk mbështet në realitetin e largimeve masive të cilat do të tregohen edhe në Censin që do duhej të ishte zhvilluar shumë më herët”, tha Tabaku.
Vlerësime të ngjashme ndau edhe socialisti Erion Braçe.
“Projektligji është sigurisht pozitiv, por ai i shërben vetëm shtresës së mesme. Nuk zgjidh hallet e atyre poshtë shtresës së mesme”, shtoi ai.
Teksa i vlerësoi të kota diskutimet për pensionet private, ish-kryeministri Berisha kërkoi nga mazhoranca përcaktimin dhe miratimin e minimumit jetik.
“Diskutohet këtu për fondet private të pensioneve. Këto janë një ligjësi në shumicën e vendeve. Çdo lloj mase që mund të merret në rrafshin financiar është absolutisht e justifikuar 100 përqind për të vendosur minimumin jetik. Ndaj dhe këto që thoni ju janë hipokrizi, janë lot krokodili, janë pashpirtësi”, tha Berisha.
Projektligji për pensionet private synon përmirësimin e procedurës së licencimit të shoqërisë administruese të fondeve të pensionit dhe forcimin e rregullave të qeverisjes së shoqërive administruese.
Burimi: A2 CNN
