Administrata e Giorgia Melonit do të arrijë objektivin e BE-së një vit më herët se sa ishte parashikuar, falë të ardhurave të larta nga taksat
Qeveria e kryeministres Giorgia Meloni pret që deficiti publik i Italisë të ulet në 3% të PBB-së këtë vit, për shkak të të ardhurave nga taksat më të larta se sa pritej, duke i mundësuar potencialisht Romës që të dalë nga procedura e deficitit të tepruar të BE-së – një mekanizëm mbikëqyrjeje kur deficiti kalon pragun 3% të PBB-së dhe që mund të çojë edhe në sanksione – një vit më herët se sa parashikohej.
Ndërsa ministri i Financave, Giancarlo Giorgetti, kishte shprehur shpresën për një performancë të tillë në deklaratat e tij të fundit, Roma tashmë ka bërë një vlerësim zyrtar se deficiti i vitit 2025 do të bjerë në 3% të PBB-së, krahasuar me 3.3% që kishte parashikuar fillimisht.
Të ardhurat tatimore të Italisë nga janari deri në korrik u rritën me 5% krahasuar me të njëjtën periudhë të vitit të kaluar, duke sjellë 16 miliardë euro shtesë në arkën e shtetit, një rritje që ekonomistët thonë se reflekton rritjen e fortë të punësimit dhe presionet inflacioniste.
Megjithatë, Komisioni Europian nuk do të vlerësojë nëse Italia mbetet brenda pragut prej 3% të deficitit deri në pranverën e vitit 2026, kur të jenë në dispozicion të dhënat e plota për vitin. Italia hyri në procedurën e deficitit të tepruar (Excessive Deficit Procedure, EDP)në vitin 2024.
Nëse arrin të dalë nga kjo procedurë, Ministria e Financave tha se do të fillojë të përdorë fondet europiane, deri në 12 miliardë euro deri në vitin 2028, për investime në mbrojtje.
Edhe pse ulja e deficitit shihet si një arsye për optimizëm, rritja ekonomike mbetet e dobët, pavarësisht injektimit masiv të fondeve europiane nga programi i rimëkëmbjes pas Covid-19, ku Italia është përfituesja më e madhe.
Në projeksionet e së enjtes, qeveria e Melonit vlerësoi se ekonomia italiane do të rritet vetëm 0.5% këtë vit, pasi eksportuesit po përballen me efektet e tarifave të vendosura nga presidenti i SHBA-së Donald Trump.
Pritet që ritmi ekonomik të përshpejtohet lehtë në vitet e ardhshme: qeveria parashikon një rritje të PBB-së prej 0.7% në 2026, 0.8% në 2027 dhe 0.9% në 2028.
Italia, dikur e njohur për problemet fiskale, sot vlerësohet për përpjekjet në disiplinën buxhetore, të cilat kanë ndihmuar në uljen e ndjeshme të diferencës mes bonove të saj shtetërore dhe atyre gjermane (të ashtuquajturit spread, që mat besueshmërinë e Italisë në tregjet financiare krahasuar me Gjermaninë si vendi më i sigurt i Eurozonës), duke lehtësuar edhe koston e huamarrjes së Romës.
Por Francesco Giavazzi, ish-këshilltar ekonomik i kryeministrit të mëparshëm Mario Draghi, tha se përmirësimi i financave publike është mundësuar nga presionet inflacioniste dhe ka ardhur në kurriz të fuqisë blerëse të shumë familjeve.
Sipas tij, inflacioni ka sjellë rritje pagash që i kanë vendosur shumë italianë në shkallë më të larta tatimore. “Janë njerëzit ata që po e paguajnë këtë, sepse po paguajnë më shumë taksa. Është një korrigjim fiskal i barabartë me një rritje taksash, por i fshehur, sepse njerëzit nuk e shohin. Nuk është një ligj i miratuar në parlament, inflacioni e bën punën për ju.”
Me pagat më të larta nominale, shumë italianë gjithashtu kanë humbur të drejtën për subvencione dhe përfitime sociale për shtresat në nevojë, duke lehtësuar më tej barrën mbi financat publike, por duke rënduar të ardhurat e familjeve.
“Ngritja e taksave nuk ndihmon rritjen, prandaj nuk është çudi që rritja është vetëm 0.5%,” tha Giavazzi.
Në buxhetin e ardhshëm, qeveria e koalicionit të Melonit pritet të ulë normën tatimore për të ardhurat mesatare nga 35% në 33%, për personat me të ardhura vjetore nga 28 mijë deri në 50 mijë euro.
“Ne synojmë të rrisim kapacitetin shpenzues të familjeve, për të sjellë më shumë qetësi në ekonomi dhe për të nxitur konsumin vendas,” tha Marco Osnato, anëtar i partisë Fratelli d’Italia dhe kryetar i komisionit të financave në parlament. / FT
Postimi ” Qeveria e Italisë parashikon që deficiti të ulet në 3% këtë vit ” eshte marre nga Revista Monitor.
