Qeveria do të vijojë politikën e nisur për shtrëngimin fiskal dhe heqjen e përjashtimeve të bëra deri më tani për biznese në sektorë të ndryshëm, si një ndër rekomandimet kryesore edhe të Fondit Monetar Ndërkombëtar.
Në dokumentin e kuadrit makroekonomik fiskal 2024-2026, parashikohet qa politika fiskale do të vazhdojë të jetë e orientuar drejt konsolidimit në periudhën afatmesme dhe afatgjatë, gjë që pritet të jetë një faktor frenues për ecurinë e ekonomisë.
Megjithatë në dokument argumentohet se “konsolidimi fiskal i synuar nga qeveria do të kufizojë kërkesën e përgjithshme të sektorit publik. Si i tillë, nuk pritet të jetë një nxitës i rritjes në periudhën afatmesme.
Megjithatë, konsolidimi fiskal do të ulë primin e riskut në periudhën afatmesme dhe do të rrisë hapësirat për stimul në sektorin privat, fondamente mjaft të rëndësishme këto për sigurimin e një rritjeje të lartë e të qëndrueshme”. Gjithashtu theksohet se në të njëjtën kohë, komponentët e politikave buxhetore të planifikuara do të mbështesin rritjen dhe për këtë arsye efekti shtrëngues i konsolidimit fiskal pritet të kompensohet.
Nga ana tjetër qeveria planifikon që politika buxhetore e qeverisë për të ruajtur një nivel të investimeve publike në mbi 5 për qind të PBB në vitet 2024 –2026 do të stimulojë formimin e kapitalit fiks bruto në ekonomi, esenciale kjo për të mbështetur nivele relativisht të larta rritje në periudhën afatmesme dhe afatgjatë.
Nga pikëpamja e ofertës agregate, qeveria parashikon që të gjithë sektorët kryesorë të vazhdojnë të rriten pak a shumë me të njëjtin trend të mesatares së tyre historike. Rritja më e madhe pritet nga industria dhe shërbimet, ndjekur nga ndërtimi dhe bujqësia.
Elisabeta Dosku /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
