Qytetarët dhe bizneset kanë paguar më shumë tatim ndaj ambienteve të dhëna me qira përgjatë vitit që lamë pas. Referuar të dhënave zyrtare, administrata tatimore ka arkëtuar 40.9 milionë euro në vitin 2022, një shifër kjo në rritje me 3.1 milionë euro krahasuar me një vit më parë.
Pro çfarë ka ndikuar në rritjen e të ardhurave. Sipas ekspertëve të pasurive të paluajtshme, arsyeja e parë lidhet me rritjen e çmimeve për ambiente banimi apo komerciale, çka ka bërë që edhe tatimi i paguar mbi këto njësi të jetë më i lartë.
Dhe e dyta lidhet me hedhjen në treg të shumë ambienteve për qira gjatë vitit që lamë pas, nga ata qytetarë që më parë i mbanin të mbyllura, me qëllim përfitimin nga trendi rritës i kërkesë dhe çmimeve. Por sa është norma tatimore që paguhet mbi qiratë? Sipas ligjit në fuqi “për tatimin mbi të ardhurat” , tatimi i aplikuar është 15 për qind e vlerës së qirasë mujore, e cila në asnjë rast nuk mund të jetë më e vogël se vlera referencë e miratuar sipas zonave me vendim qeverie.
Pra nëse qiraja është në vlerën 50 mijë lekë në muaj, tatimi që duhet paguar është 7500 lekë në muaj. Referuar ligjit, “Në rastin kur një individ ia ka dhënë pronën me qira një subjekti të regjistruar, ky i fundit është përgjegjës për mbajtjen, deklarimin dhe pagesën e tatimit në burim për llogari të organit tatimor.
Kur qiramarrësi është një person i paregjistruar, si në rastin e turistëve vendas apo të huaj, individi qiradhënës si përfitues i të ardhurave, është i detyruar të deklarojë dhe të paguajë në organin tatimor, tatimin në burim jo më vonë se data 20 e muajit që pason muajin në të cilin është kryer pagesa”. Të gjithë tatimpaguesit që ushtrojnë aktivitet, duhet të dorëzojnë në Drejtorinë Rajonale Tatimore një kopje të kontratës së qerasë apo të kontratës së pronësisë së ambientit.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
