Me numrin e turistëve që është në rritje të vazhdueshme në Shqipëri, industria e turizmit do të ketë një peshë gjithmonë e më të madhe në ekonominë tonë. Kur shohim ofertën turistike në vendin tonë, vemë re që ajo përbëhet si nga struktura të mëdha hotelesh ose kompani ndërkombëtare që kanë hyrë në tregun tonë, ashtu edhe nga sipërmarrës të vegjël vendas, ose persona privatë që japin me qera ambientet ose facilitetet e tyre.
Tashmë në Shqipëri ekziston një platformë online, që është konceptuar t’u vijë në ndihmë sipërmarrësve vendas, për të ekspozuar ofertën e tyre në internet, dhe të marrin rezervime online direkt nga turistët e huaj, të cilët kërkojnë çmime më të favorshme gjatë vizitës së tyre në Shqipëri.
“Rentfromlocals” është një platformë, e cila synon të krijojë një treg të përbashkët për marrjen me qira të makinave ose apartamenteve prej bizneseve lokale dhe individëve. Platforma lejon të gjithë ata që kanë një makinë ose apartament, të vendosin ne platforme pa kosto dhe ta japin me qira gjatë kohës që ajo është e papërdorur.
Sipas zhvilluesve te kesaj platforme Marin Nikolla, Kledjan Zaimi e Elvis Koleka, qëllimi i tyre është t’i ofrojnë një mënyrë të shpejtë operatorëve të vegjël turistikë në vendin tonë, për të digjitalizuar biznesin e tyre, dhe krijimi i një ure direkte midis tyre dhe turistëve të huaj. Platforma ka nisur të jetë e disponueshme gjatë 2022 në adresën https://www.rentfromlocals.al. Ajo bazohet në teknologji mjaft të avancuar dhe bashkëkohore, për t’i ofruar përdoruesve të saj një eksperience optimale.
Ideja lindi më shumë se një vit më parë, pasi eksperienca personale e bashkëthemeluesve bëri të kuptonin menjëhere nevojën që kishte vendi i tyre për këtë shërbim. Pas analizës së thelluar të tregut, analizës së konkurencës dhe shërbimeve të ofruara prej tyre u hartua dhe konkretizua vënia në jetë e një projekti që në të ardhmen mund të kalojë kufijtë e Shqipërisë duke u shtrirë më gjerë në rajon.
Masivizimi i kësaj forme dhe mënyre të dhënies së makinave apo apartamenteve me qira do të rrisë konkurrencën e ndershme, do të sjellë një rregullim të këtij tregu, çmime më të arsyeshme, rritje të cilesisë të shërbimit si edhe rritjen e volumit të rezervimeve për shkak të ekspozimit më të gjerë tek turistët e huaj.
Fluksi i turistëve të huaj është në rritje konstante dhe qëllimi është që ata të mos orientohen vetëm në kompanitë e mëdha të makinave apo zinxhirëve të hoteleve ndërkombëtare, por edhe drejt tregut vendas që ka shumë për të ofruar në drejtim të cilësisë dhe çmimeve të favorshme.
Është shumë e rëndësishme që këto oferta mjaft interesante lokale të bëhen lehtësisht të aksesueshme nëpërmjet internetit në mbarë botën.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
