Ola Mitre /
Korporata Elektroenergjetike Shqiptare ka shpenzuar rreth 11.8 mln euro në 2 procedura tenderuese për blerje energjie, për plotësimin e nevojave konsumatore në periudhën 12 – 25 gusht. Në total janë blerë 90 300 mWh energji, ndërsa çmimi varion nga 114 euro/mWh, në 135 euro/mWh.
Këto shpenzime kanë rritur faturën për blerje energjie për vitin 2024, duke e çuar në 43.8 mln euro. Kjo shumë është shpenzuar vetëm nga mesi i muajit qershor, kur nisën edhe importet e para apo thënë ndryshe për plotësimin e nevojave konsumatore për një periudhë prej rreth 2 muaj e gjysmë. Nevoja për të importuar energji vjen si pasojë e mungesës së reshjeve të shiut që do të ndikonin në prodhimin e energjisë nga Kaskada e lumit Drin, teksa edhe kërkesa gjatë muajve të verës rezulton në rritje si pasojë e temperaturave të larta.
Ndërkohë që, fatura e rezulton e lartë edhe për shkak të çmimeve me të cilat blihet energjia, sidomos pas javës së parë të korrikut që kanë patur tendencë në rritje. Në total, gjatë vitit 2024 janë importuar rreth 358 000 mWh energji, ndërsa çmimi mesatar përllogaritet në 120 euro/ mWh.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
