Buxheti ka arkëtuar nga taksat e tatimet 366 miliardë lekë në 6 mujorin e parë të vitit 2025, me një rritje prej 6.7%, ose 22.8 miliardë lekë më shumë, në krahasim me të njëjtën periudhë të një viti më parë, njoftoi Ministria e Financave.
Shpenzimet e përgjithshme publike arritën në rreth 332.5 miliardë lekë në 6 mujorin e parë të vitit 2025. Për shkak të të ardhurave më të larta se shpenzimet, buxheti ka rezultuar me një suficit prej 33.5 miliardë lekësh.
Në rritje prej 22.8 miliardë lekë të të ardhurave ndikimin kryesor e kanë dhënë tatimi mbi të ardhurat personale, të ardhurat e të cilit ishin 8.6 miliardë lekë më shumë, si dhe sigurimet shoqërore e shëndetësore, të cilat sollën 9.7 miliardë lekë, me një total prej rreth 18 miliardë lekësh, ose 180 milionë euro. vitin e kaluar, qeveria ndoqi një politikë agresive të rritjes së pagave në administratën publike, që automatikisht rrit të ardhurat nga sigurimet shoqërore e tatimi mbi pagën. Edhe administrata tatimore në fund të viti ttë kaluar nisi një aksion për deklarimet reale të pagave në sektorin privat.
Të ardhurat
Sipas njoftimit të Ministrisë së Financave, të ardhurat totale, për periudhën Janar – Qershor 2025, arritën në rreth 366 miliardë lekë, një realizim në masën 100.6 % të planit të periudhës. Krahasuar me të njëjtën periudhë të një viti më parë, u mblodhën rreth 22.8 miliardë lekë më shumë ose 6.7 % më shumë. Në terma vjetorë, të ardhurat totale për 6 mujorin e vitit 2025 u realizuan në masën 48.3% të planit vjetor.
Të ardhurat e arkëtuara nga Tatimet dhe Doganat, për periudhën Janar – Qershor 2025, janë në shumën 242.3 miliardë lekë, rreth 20.2 miliardë lekë ose 9.1% më shumë në krahasim me Janar – Qershor 2024.
Të ardhurat tatimore të mbledhura nga administrata doganore (të ardhurat nga TVSH në import, akciza, taksa doganore dhe renta minerare) për periudhën Janar – Qershor 2025 u realizuan në vlerën 113.6 miliardë lekë, 3.7 miliardë lekë ose 3.4% më shumë se Janar – Qershori i vitit 2024.
– Të ardhurat nga TVSH në import, për periudhën Janar – Qershor 2025, janë 75.9 miliardë lekë, 674 milionë lekë ose 0.9% më shumë se e njëjta periudhë e një viti më parë.
– Të ardhurat nga akciza, për periudhën Janar – Qershor 2025, janë realizuar në shumën 32.1 miliardë lekë, 3.2 miliardë lekë ose 11.2% më shumë se e njëjta periudhë e vitit 2024, si dhe realizim në shumën 1.5 miliardë lekë ose 4.8% më shumë se plani i akcizës për periudhën Janar – Qershor 2025.
– Të ardhurat e arkëtuara nga renta minerare në eksport, për periudhën Janar – Qershor 2025, janë në shumën 1.1 miliardë lekë, një realizim prej 78.1 % kundrejt planit të periudhës Janar – Qershor 2025.
– Të ardhurat nga taksat doganore, për periudhën Janar – Qershor 2025, janë arkëtuar në vlerën 4.5 miliardë lekë, 183 milionë lekë ose 4.2% më shumë se Janar – Qershori i vitit 2024, si dhe realizim prej 87.9% kundrejt planit të periudhës.
Të ardhurat tatimore të mbledhura nga administrata tatimore (të ardhurat nga TVSH neto në vend, tatimi mbi fitimin, tatimi mbi të ardhurat personale, taksat nacionale), për periudhën Janar – Qershor 2025, u realizuan në shumën 128.7 miliardë lekë, 16.5 miliardë lekë ose 14.7% më shumë se Janar – Qershori i vitit 2024. Krahasuar me planin, të ardhurat e mbledhura janë 2.8 miliardë lekë ose 2.2% më shumë.
– Të ardhurat nga TVSH e arkëtuar (neto) u realizuan në shumën 33.2 miliardë lekë, 5.7 miliardë lekë ose 20.8% më shumë se periudha Janar – Qershor 2024, dhe me realizim në shumën prej +918 milionë lekë ose 2.8% më shumë se plani i periudhës. Rimbursimet e dhëna për periudhën Janar – Qershor 2025 janë në shumën 11.1 miliardë lekë.
– Të ardhurat e mbledhura nga tatimi mbi fitimin u realizuan në shumën 33.2 miliardë lekë, 645 milionë lekë, ose 2% më shumë se periudha Janar – Qershor 2024.
– Të ardhurat nga tatimi mbi të ardhurat personale, për periudhën Janar – Qershor 2025, janë në shumën 40.8 miliardë lekë, 8.6 miliardë lekë ose 26.6% më shumë se periudha Janar – Qershor 2024, si dhe 5.4 miliardë lekë ose 15.4% më shumë se plani i periudhës Janar – Qershor 2025.
– Të ardhurat nga taksat nacionale, për periudhën Janar – Qershor 2025, u realizuan në shumën 21.5 miliardë lekë, 1.6 miliardë lekë ose 7.8% më shumë se Janar – Qershori i vitit 2024.
– Të ardhurat nga Fondet Speciale, që përfshijnë të ardhurat nga sigurimet shoqërore dhe shëndetësore, të mbledhura nga Administrata Tatimore, ISSH dhe FSDKSH për periudhën Janar – Qershor 2025 u realizuan në shumën 87.6 miliardë lekë, 9.7 miliardë lekë ose 12.5% më shumë se periudha e viti 2024, si dhe me realizim prej 104.8% të planit të periudhës.
Shpenzimet
Shpenzimet e përgjithshme publike, për periudhën 6 mujore të vitit 2025, arritën në rreth 332.5 miliardë lekë me një realizim në masën 99.8% e planit të periudhës, ndërsa krahasuar me të njëjtën periudhë të vitit 2024, ky zë ka rezultuar 14.1% më i lartë ose rreth 41.2 miliardë lekë më shumë. Në terma vjetorë, shpenzimet e përgjithshme për 6 mujorin e vitit 2025 u realizuan në masën 40.3% të planit vjetor sipas buxhetit fillestar dhe 40.2% sipas Aktit Normativ Nr. 6 datë 11.06.2025.
– Shpenzimet korente, për periudhën 6 mujore të vitit 2025, rezultuan në rreth 299.6 miliardë lekë. Krahasuar me të njëjtën periudhë të një viti më parë ky zë rezultoi 13.2% më i lartë ose rreth 34.8 miliardë lekë më shumë, si dhe me një realizim në masën 99% të planit të periudhës.
– Shpenzimet kapitale, për periudhën 6 mujore të vitit 2025, rezultuan në rreth 32 miliardë lekë. Krahasuar me të njëjtën periudhë të një viti më parë ky zë rezultoi 20.8% më i lartë ose rreth 5.5 miliardë lekë më shumë, si dhe me një realizim në masën 108.1% të planit të periudhës.
– Niveli i suficitit, në periudhën 6 mujore të vitit 2025, rezultoi në rreth 33.5 miliardë lekë. Krahasuar me të njëjtën periudhë të një viti më parë, niveli i suficitit rezultoi 35.3% më i ulët ose 18.3 miliardë lekë më pak.
Burimi: Ministria e Financave
Postimi ” Rritja e pagave çoi në buxhet 180 mln euro më shumë nga sigurimet e tatimi i të ardhurave personale ” eshte marre nga Revista Monitor.
