Rajoni i Korçës do të jetë pjesë e disa ndërhyrjeve në rrjetin e energjisë kryesisht në tension të ulët duke përfshirë qytetin por edhe disa fshatra duke nisur nga Boboshtica, Vithkuqi, Mborja, Drenova e Braçi.
Konkretisht Operatori i Sistemit të Shpërndarjes OSSh përmes drejtorisë rajonale parashikon që ky zëvendësim i rrjetit me një të ri të ndikojë në disa mijëra familje.
Konkretisht në dokumente kompania publike nënvizon se referuar strategjisë së zhvillimit dhe përmirësimit të rrjeteve elektrike ne rajonin Korçë është hartuar projekti i rrjetit elektrik për fiderat 1,2,3,4,6,7 ne qytetin Korçë.
“Projekti përmban linjat e tensionit të ulet të cilët do të kthehen nga përcjellës të zhveshur me kabull ABC.
Ky projekt është i nevojshëm pasi kjo zonë aktualisht ka një rrjet në gjendje të keqe teknike, shumë të ngarkuar dhe me humbje të larta teknike dhe jo teknike. Ky projekt përfshin 13270 abonentë (familjarë dhe privatë)”, thuhet në dokument.
Specifikisht për Boboshticën projekti parashikon që përfitues të jenë 255 abonentë ku bëjnë pjesë familjarë dhe subjekte private. Ndërkohë në zonën e Vithkuqit ku do të kryhet e njëjta ndërhyrje do të jenë të ndikuar 360 abonentë ku edhe këtu bëjnë pjesë familjarë dhe biznese.
Në zonën e Mborjes në afërsi të qytetit të Korçës investimi do të lidhet sërish me linja kabull të veshur dhe përfshihen 687 abonentë kurse në fshatin Barç do të jenë të paktën 300 abonentë.
E fundit në listë është Drenova nga ku janë 821 abonentë që do të kenë ndryshim të rrjetit me të cilin furnizohen duke kaluar në kabull ABC.
Fituesi i procedurës së prokurimit të OSSH dhe që do të jetë zbatues i projektit është kompania Everest.
Postimi ” Rrjeti i energjisë, 1.5 mln euro për ndërhyrjet në Korçë e rrethina ” eshte marre nga Revista Monitor.
