Kontrolli i Lartë i Shtetit ka konstauar efekte negative financiare në koncesionin e Kaskadës së Devollit, duke nisur nga të ardhurat e munguar e deri te dëmi ekonomik. Përmes një auditimi mbi përputhshëmrinë e projektit, KLSH ka konstatuar efekte negative në administrimin e fondeve për ndërtimin e strukturës zëvendësuese në Banjë dhe Moglicë si dhe menaxhim pa ekonomi, eficiencë dhe efektivitet të tyre në vlerën 5,528,607 euro.
Po ashtu, janë konstatuar të ardhura të munguara në procedurën e kontraktimit me konciesionarin në vlerën 5,119,000 euro, si dhe dëme ekonomike në vlerën 1,016,272 euro në rimbursimin e shpenzimeve jo të justifikuara.
Nga ana tjetër është konstatuar mangësi në drejtim të plotësimit të kritereve dhe specifikimeve gjatë procedurave të zgjedhjes së operatorit fitues në kontratën përfundimtare. Paralelisht, KLSH konstaton se kontributi që kjo vepër energjetike jep për sigurinë energjetike të vendit është tejet e vogël. “Në kontratë është përcaktuar se koncesionari mund ta shesë energjinë elektrike në eksport pa asnjë kufizim.
Ky përcaktim ka devijuar objektivin kryesor që ishte rritja e kapaciteteve energjetike në vend, sepse koncesionari pasi ka filluar prodhimin e energjisë ka vënë në dispozicion sasi të vogla energjie brenda vendit”, – thekson ndër të tjera KLSH, teksa shton se vende si Norvegjia detyrojnë koncesionarët të lëvrojnë 10% të energjisë së prodhuar tek autoritetet lokale ku ndodhet baseni ujor, me kosto të ulët ose me kosto prodhimi. KLSH shpreh rezerva edhe në drejtim të dokumentacionit që duhej të vendosej në dispozicin nga Ministria e Infrastrukturës dhe Energjisë dhe nga kompania koncesionare “Devoll Hydropower”.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
