Në Europë çmimi i sheqerit shënoi vlera rekord përsa i përket rritjes së mëtejshme edhe në këtë fillim viti, por ndërkohë ky produkt në Shqipëri shënoi një trend të kundërt. Një vit më parë Shqipëria regjistronte një rritje rreth 30% më shumë të sheqerit teksa në 3 muajtë e parë të 2023 çmimi ra ndjeshëm, ku konkretisht muaji mars regjistroi vlerën 11% ose 2.5 herë më pak se 2 muajt e parë.
Sipas të dhënave të publikuara nga Agjencia Europiane e Statistikave, sheqeri ka qenë një nga produktet ushqimore me rritjen më të lartë të çmimeve. Të dhënat mujore tregojnë një rritje të vazhdueshme të normave vjetore të ndryshimit duke filluar nga gushti 2021, duke arritur në 61% në shkurt dhe mars 2023.
Në mars 2023, rritjet më të larta të inflacionit vjetor për sheqerin u regjistruan në Çeki (98%), Estoni (97%), Poloni (82%), Gjermani (72%) etj. Ndërsa më të ulëtat regjistrohen në Norvegji 10% dhe Shqipëri 11%.
Nëse ndalemi në rajon Shqipëria regjistron një vlerë 2.5 herë më të ulët se Maqedonia e Veriut dhe Mali i Zi teksa shifrat për Kosovën nuk bëhen të ditura për 3 muajtë e parë të vitit. Kjo rënie e ndjeshme që e diferencon Shqipërinë nga rajoni dhe Europa ka ndodhur në muajtë shkurt-mars.
Çmimi i sheqerit është rritur në nivelin më të lartë të 11 viteve. Çmimet e ushqimeve të përpunuara kanë qenë në rritje për shkak të rritjes së kostove të energjisë. Në Europë, ky vit ka qenë i dobët për prodhimin e sheqerit të panxharit për shkak të zvogëlimit të sipërfaqeve të kultivuara dhe thatësirës së stinës së verës, e kombinuar me rritjen e kërkesës. Rreth 80% e prodhimit të sheqerit në botë vjen nga kallam sheqeri, sipas Organizatës Ndërkombëtare të Sheqerit, ndërsa 20% vjen nga panxhari.
Marinela Lina/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
