Qytetarët shqiptarë duket se po orientohen më shumë drejt blerjes së automjeteve luksoze, pavarësisht taksave ekstra që duhet të paguajnë. Të dhënat zyrtare nga Drejtoria e Përgjithshme e Tatimeve, të përpunuara nga ScanTv, tregojnë se përgjatë vitit 2023, qytetarët kanë paguar afro 1.8 milionë euro taksa për regjistrim fillestar për automjete luksoze.
Në krahasim me një vit më parë, regjistrohet një rritje prej 24.4 për qind, çka tregon edhe shtimin e numrit të automjeteve luksoze në vend, duke qenë se është një tarifë që paguhet vetëm në momentin e regjistrimit të tyre.
Nga ana tjetër edhe taksa e përvitshme për automjetet luksoze ka njohur një rritje me 9.6 për qind, duke bërë që luksi tu kushtojë këtyre individëve afro 2.8 milionë euro.
Automjet luksoz konsiderohet autovetura deri në 6+1, e cila plotëson të paktën njërin nga kushtet e mëposhtme: Cilindratën e barabartë ose më të madhe se 3000 cm3; ose Vlerën/çmimin të barabartë ose më shumë se 5 milionë lekë.
Vlera e mjetit, llogaritet si vlera kur mjeti regjistrohet për herë të parë ose/dhe sa herë ndryshon pronësia e tij. Vlera e mjetit, për efekt të klasifikimit “Automjet Luksoz”, reduktohet çdo vit me 10% të vlerës së mbetur.
Taksa e regjistrimit të automjetit luksoz është në masën 70,000 lekë dhe cila paguhet në momentin e regjistrimit. Taksa e përvitshme për mjetet luksoze është në nivelin 21,000 lekë.
Këtë vit, Drejtoria e Përgjithshme e Tatimeve po ndërmerr një projekt pilot me Drejtorinë e Përgjithshme të Shërbimeve të Transportit Rrugor të Shqipërisë për të krahasuar individët që zotërojnë makina luksoze me deklarimin e tyre të të ardhurave personale, (DIVA) si fazë e parë e këtij projekti dhe në të ardhmen për të zgjeruar shkëmbimin e informacionit lidhur me asetet e tjera të tatimpaguesit.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
