Në dy muajt e parë të vitit, buxheti i shtetit ka arkëtuar 104 miliardë lekë , duke tejkaluar të njëjtën periudhë të 2023-shit me 6.8 miliardë lekë. Performanca në vjeljen e taksave ka bërë që për periudhën janar-shkurt, niveli i suficitit të regjistrohet në 20.7 miliardë lekë apo rreth 200 milionë euro.
Të dhënat fiskale të Ministrisë së Financave, tregojnë se të ardhurat tatimore për 2 mujorin 2024 u realizuan në masën 63.3 miliardë lekë, 10.8 miliardë ose 20.6% më shumë se 2 mujori i vitit të kaluar, si dhe 5.6 miliardë lekë, më shumë se plani i 2 mujorit 2024.
Ndikim të rëndësishëm kanë dhënë të ardhurat e arkëtuara nga TVSH, me rreth 3.8 miliardë lekë më shumë se një vit më parë, çka tregon konsum në rritje i cili vjen edhe për shkak të uljes së çmimeve por edhe fluksit të turistëve i cili ka qenë i lartë edhe gjatë kësaj periudhe.
Të ardhurat nga kontributet e sigurimeve shoqërore gjithashtu kanë pasur një rritje me 3.7 miliardë lekë, duke ndikuar ndjeshëm në të ardhurat totale. Nga tatimi mbi fitimin u mblodhën 5.9 miliardë lekë, ose 20.6% më shumë se 2 mujori 2023 dhe tatimi mbi të ardhurat personale është arkëtuar në vlerën 10.5 miliardë lekë, 1.4 miliardë lekë ose më shumë se një vit më parë.
Sa i takon të ardhurave doganore, ato u realizuan në vlerën 32 miliardë lekë, ose 4.5% më shumë se 2 mujori 2023. Të gjithë zërat kanë perfomuar pozitivisht, përfshirë këtu edhe TVSH-në në import, duke qenë se ka pasur një rënie të inflacionit.
Shpenzimet e përgjithshme publike për periudhën 2 mujore të vitit 2024, arritën në rreth 83.3 miliardë lekë me një realizim në masën 92.2 përqind të planit të periudhës.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
