Skema e subvencioneve në bujqësi do të ndryshojë për t’u afruar më shumë me mënyrën se si operohet në Bashkimin Europian. Kjo duke nisur nga eliminimi i hapësirave për të përfituar nëse nuk ke një prodhim që del në treg. Zv/ministri i Bujqësisë, Enio Civici, deklaroi në Insider se thirrja e vitit të ardhshëm do të shtojë kërkesat për të qenë pjesë e një zinxhiri.
“Skema e re kombëtare e mbështetjes në bujqësi e vitit 2024 do të jetë një skemë shumë e ndryshme nga ajo që kemi patur. Jo në sensin e masave dhe çfarë mbështet, por kërkesave për të qenë pjesë e një zinxhiri vlere, një bashkimi operatorësh, e një SHBB-je, e një shoqate. Arsyeja pse ne po bëjmë subvencion është sepse i ulim koston prodhimit që arrin në treg”
Me këto ndryshime praktikisht shmangen disa abuzime, si nafta që i kalonte pronarit të tokës për të mbushur automjetin, ndërkohë që tokën e punonte qiramarrësi pa përfituar nga skemat.
Skema kombëtare pritet të shtojë edhe një element të ri sa i takon masave të tregut.
“Deri tani ka patur komponentin e zhvillimit rural dhe subvencionit. Tani shtohet komponenti i masave për tregun, siç funksionon skema e Bashkimit Europian. Kjo e treta është që të aftëson të përballesh me kërkesat e tregut: një paketim më interesant, një kontroll pak më i shpeshtë”.
Krahas marketingut dhe promovimit të produkteve bujqësore shqiptare, kjo masë synon një kontroll dhe monitorim më të madh të tregut.
Angelo Haruni/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
