Operatori i Sistemit të Shpërndarjes synon të bëjë një investim të ri për linjën 35 kilovolt në zonën që përfshin Spillenë dhe Divjakën.
Referuar një procedure prokurimi të çelur këtë të martë, me fond limit 229 milionë lekë apo 2.3 mln euro, nënvizohet se ky investim pritet të ndikojë pozitivisht si për aspektin turistik që përfaqëson kjo zonë, ashtu edhe për investimet në fotovoltaikë që janë në zgjerim në këtë rajon.
“Rikonstruksioni dhe fuqizimi i kësaj linje të re do të bëjë të mundur furnizimin me energji elektrike me parametra teknikë dhe standardet e duhura për një numër të madh konsumatorësh në zonat bregdetare Divjakë, Spille dhe ato të Rrogozhinës, por do të ketë përfitime edhe për të gjithë konsumatorët e këtyre zonave, për perspektivën e investimeve që ka marrë gjithë bregdeti shqiptar.
Ky projekt do të rrisë kapacitetet transmetuese dhe shpërndarëse në rrjetin TM, do të rrisë sigurinë e furnizimit me energji të konsumatorëve privatë me parametra teknikë dhe cilësi më të lartë shërbimi, do të reduktojë humbjet teknike në rrjetin e tensionit të mesëm dhe do të mundësojë prodhimin e energjisë së pastër nga impiantet fotovoltaike,” thuhet në raportin teknik që shoqëron procedurën.
Dokumenti saktëson se ky projekt ka si qëllim idenë e ndërtimit të linjës re 35 kV me një qark nga N.Stacioni 110/35/20/6 kV Kavajë – N.Stacion 35/10 kV Rrogozhinë, e cila shërben edhe për rritjen e sigurisë në furnizimin e N.Stacioneve Divjakë dhe Ballaj, me shtylla të reja metalike 110 kV dhe e mbrojtur me përcjellës trosi OPGË gjatë gjithë gjatësisë së tij.
Linja e re do të lidhet me shtyllën fundore 35 kV me dy qarqe që furnizon N.Stacionin Kavajë me kabell 35 kV, XLPE, me përcjellës alumini 1×300/20 Cu mm², dhe do të lidhet me N.Stacionin e Rrogozhinës me trasenë më të mirë që mund të gjendet, duke iu përshtatur terrenit ekzistues, dhe lidhja me të njëjtin kabell 35 kV.
Linja ka një gjatësi prej afërsisht 18 km në total, do të jetë 35 kV me shtylla me konstruksione metalike të reja, izolacioni i shtyllave 110 kV dhe e mbrojtur me përcjellës trosi gjatë gjithë gjatësisë së saj.
Postimi ” Turizmi dhe fotovoltaikët nxisin investime në zonën e Divjakës, OSSH 2.3 mln euro për linjën 35 kV ” eshte marre nga Revista Monitor.
