Ola Mitre /
Konsumi i energjisë elektrike ka pësuar rritje, si pasojë e temperaturave të larta gjatë javëve të fundit teksa Korporata Elektorenergjetike Shqiptare ka realizuar disa procedura blerjeje energjie, për plotësimin e nevojave konsumatore.
Sipas të dhënave të përpunuara nga TV gjatë muajit korrik janë realizuar 7 tenderë, teksa në total janë shpenzuar gati 3.4 mln euro. Çmimi mesatar, me të cilin është siguruar energjia varion nga 100 – 123 euro/mWh, teksa sasitë e blera gjatë procedurave të realizuara nuk kanë qenë shumë të mëdha. Ndërkaq, këto shpenzime i shtohen atyre të realizura më herët, duke bërë që deri më tani fatura të shkojë në 15.4 mln euro.
Viti 2024 mund të kosniderohet i mirë nga pikëpamja hidrike, pasi prodhimi në Kaskadën e lumit Drin arriti të plotësojnte nevojat konsumatore deri në mesin e muajit qershor, kur nisën eksportet e para.
Në gjysmën e parë të vitit situata hidrike favorizoi aktivitetin tregtar të KESH, që zhvilloi 2 tenderë për shitje energjie si dhe një sërë procedurash optimizimi. Një procedurë optimizimi është realizuar edhe gjatë muajit korrik, përmes të cilës Korporata gjeneroi 77200 euro.
Realizimi i procedurave të shit – blerjes së energjisë synon përfitimin nga diferenca e çmimit të shitjes me atë të blerjes. Kjo pasi, e njëjta sasi energjie blihet dhe shitet në profile të ndryshme orare. Në total, së bashku me procedurën e fundit të optimizimit, KESH ka gjeneruar gjatë këtij viti rreth 6.3 mln euro të ardhura nga aktiviteti tregtar.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
