Viti që lamë pas, njihet zyrtarisht si viti i çmimeve rekord të paktën në dekadën e fundit, si pasojë e luftës Rusi-Ukrainë. Kjo ka bërë që të ardhurat nga TVSH në buxhetin e shtetit të shënojnë perfomancë pozitive dhe të kenë një peshë të konsiderueshme. Referuar buxhetit faktit të vitit 2022 të depozituar për shqyrtim në komisionet parlamentare, të ardhurat nga T.V.SH u regjistruan në 191.4 miliardë lekë, më një rritje prej 18.5 % ose 29.9 miliardë lekë në raport me 2021. Për shkak të çmimeve të më larta, rritje ka pësuar TVSH në import por edhe ajo brenda vendit.
Por sa ka qenë kontributi konkret që ka dhënë rritja e çmimit të mallrave te importit në tregjet ndërkombëtare krahasuar me vitin 2021, për disa artikuj me peshë në performancën e TVSH-së? Referuar dokumentit, rritja e çmimit të karburantit import, dha një efekt pozitiv prej 5,3 miliardë lekë ose 30%, rritja e çmimit të energjisë elektrike dha efekt pozitiv prej 4.9 miliardë lekë ose 64%, dhe rritja e çmimit të metaleve bazë dhe artikujve e tyre, kontribuoi me 2.9 miliardë lekë ose 26%.
Ndërkohë, të nga TVSH neto brenda vendit janë 34.5 miliardë lekë, me rritje kundrejt vitit të kaluar në masën 14.2% ose +4.3 miliardë lekë. Ndër faktorët kryesorë që kanë ndikuar në rritjen e të ardhurave të TVSH brenda vendit janë rritja e çmimeve të produkteve e shërbimeve si dhe niveli i lartë i inflacionit. Të dhënat 12-mujore të vitit 2022, mbi shpërndarjen sektoriale të TVSH-së brenda vendit tregojnë se “Shërbimet” kanë qenë sektori me kontributin më të lartë dhe që kanë xhiruar më shumë, me 34 për qind, ndjekur nga “Tregtia” përkatësisht me 30%, “dhe “Prodhimi” përkatësisht me 19 % . Ndërsa ndërtimi zë 15 % dhe transporti, vetëm 2 për qind. Këtë vit çmimet kanë hyrë në fazën e stabilizimit dhe të ardhurat nga ky zë nuk janë në nivelin e 2022-shit.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
