Bankat në vend janë të shëndetshme financiarisht, por në horizont mund të shfaqen rreziqe që të prishin këto ekuilibra. Sipas Bankës së Shqipërisë, tre janë drejtimet ku mund të kërcënohet stabiliteti i institucioneve financiare.
“Ne shikojë kryesisht rreziqet e kredisë atë të likuiditetit dhe tregut. te kredia shohim shtim të kredive të këqija si pasojë e rritjes së normave të interesit. Rreziku i likuideitet është gjithashtu. aktivet likuide janë megjithatë të bollshme. Te rreziqet e tregut i lidhim kryesisht me normat e interesit,” shprehet Klodion Shehu, Drejtor i Stabilitetit Financiar në Bankën e Shqipërisë.
Në këto kushte, Banka Qendrore i rekomandon 11 bankat tregtare të tregohen më të kujdesshme në drejtim të ruajtjes së kapitaleve rezervë në raste rreziqesh.
“Në vijim, vlerësohet se sistemi financiar dhe sektori bankar kanë vijuar të performojnë në mënyrë të qëndrueshme gjatë gjashtëmujorit të parë të vitit 2023. Por sfidat për ekonominë shqiptare, për veprimtarinë e sistemit financiar dhe të sektorit bankar mbeten të pranishme, në kushtet e pasigurisë që ruajnë zhvillimet ndërkombëtare, të brishtësive që shoqërojnë zhvillimet në fushën e teknologjisë së informacionit dhe të ekspozimeve ndaj rreziqeve të kreditit e të tregut.”
Të dhënat nga Banka e Shqipërisë tregojnë se fitimet e bankave në vend për momentin po mbështeten gati tërësisht te kredi-dhënia.
Të ardhurat nga interesat në harkun e muajve janar-qershor rezultojnë në 39.5 miliardë lekë nga 28.7 miliardë në po të njëjtën periudhë kohore të një viti më parë duke u zgjeruar kështu me 36.7 për qind.
Nëse për shkaqe të ndryshme kredi-marrësit nuk do të arrinin të paguanin këstet mujore, atëherë bankat do të gjendeshin në vështirësi financiare vlerëson Banka Qendrore.
Burimi: A2 CNN
