Ankandi i obligacioneve 7-vjeçare që u zhvillua ditën e mërkurë konfirmoi tendencën në rënie të yield-eve të instrumenteve të borxhit të qeverisë.
Sipas të dhënave nga Banka e Shqipërisë, yield-i uniform i pranuar i obligacioneve 7-vjeçare zbriti në 4.85%, nga 5.36% që kishte qenë në ankandin e fundit të këtyre instrumenteve, në muajin shtator.
Pjesëmarrja në ankand rezultoi përsëri mjaft e lartë. Nga 3 miliardë lekë që ishte shuma e shpallur për financim, kërkesat totale në ankand arritën vlerën e më shumë se 8.1 miliardë lekëve. Duke parë kërkesën e lartë dhe yield-et në rënie, Ministria e Financave vendosi të rrisë me 15% shumën e pranuar, për një vlerë totale emetimit prej 5.45 miliardë lekësh.
Yield-i i obligacioneve 7-vjeçare ka prekur nivelin më të ulët që prej marsit të vitit 2022.
Yield-et e bonove dhe obligacioneve të qeverisë shqiptare kanë ndjekur një tendencë në rënie gjatë këtij viti, falë kërkesës së lartë të investitorëve dhe gjendjes së mirë të likuiditetit në treg. Një faktor që ka shtuar kërkesën dhe likuiditetin ka qenë pjesëmarrja, për herë të parë, edhe e investitorëve jorezidentë në ankandet e titujve qeveritarë në lekë.
Ndikim të rëndësishëm ka dhënë edhe ndryshimi i kahut të politikës monetare nga Banka e Shqipërisë. Pas një cikli prej më shumë se dy vitesh në rritje, Banka Qendrore ka nisur uljen e normave të interesit. Nga një nivel maksimal prej 3.25%, këtë vit janë aplikuar dy ulje, që e kanë çuar normën bazë tashmë në 2.75%. Në veçanti, ulja e fundit, e vendosur në muajin nëntor, duket se po reflektohet shpejt në yield-et e titujve të qeverisë.
Rwnia e shpejtw e presioneve inflacioniste i ka zhvendosur nw rwnie pritshmwritw e investitorwve pwr normat e interesit. Inflacioni këtë vit ka prekur nivelet më të ulëta të tre viteve të fundit dhe në tetor shënoi nivelin 1.9%, për të dytin muaj radhazi.
Banka e Shqipërisë vlerëson se inflacioni ka rënë kryesisht për shkak efektit të çmimeve të importit dhe të forcimit të vazhdueshëm të lekut në kursin e këmbimit valutor, ndërsa presionet e brendshme inflacioniste, megjithëse në rënie, vazhdojnë të japin kontributin kryesor në strukturën e inflacionit në ekonomi.
Nga ana tjetër, normat e ulëta të interesit dhe gjendja e mirë e sektorit financiar po nxitin një rritje të kreditimit me ritme mjaft të larta.
Gjithsej, për 9-mujorin e vitit 2024 sektori bankar ka dhënë gjithsej 280.7 miliardë lekë kredi për ekonominë, në rritje me 30% krahasuar me të njëjtën periudhë të vitit të kaluar. Shtysa për rritjen e kreditimit këtë vit po vjen sidomos nga segmenti i biznesit dhe nga financimi i pasurive të paluajtshme./E.Shehu
Burimi: BSH
Postimi ” Yield-et vazhdojnë rënien, obligacionet 7-vjeçare në nivelin më të ulët që nga marsi 2022 ” eshte marre nga Revista Monitor.
