Afro 8 mijë aplikime janë depozituar në Qendrën Kombëtare të Biznesit gjatë vitit që lamë pas në regjistrin e pronarëve përfitues, i cili është detyrim ligjor. Referuar të dhënave zyrtare nga QKB, konkretisht janë trajtuar në total 7,952 aplikime nga të cilat 7, 570 aplikime nga subjektet tregtare dhe 382 aplikime nga Organizatat jo fitimprurëse.
Shqipëria miratoi ligjin “Për regjistrin e pronarëve përfitues” në vitin 2020 dhe që u bë funksional më 1 shkurt 2021. Regjistri administrohet nga QKB-ja dhe të gjitha subjektet dhe organizatat jofitimprurëse janë të detyruara të regjistrojnë në regjistër pronarët e tyre përfitues (përfshirë ndryshimet në lidhje me pronarët përfitues) brenda afateve specifike që mbikëqyren nga ky institucion.
Penalitetet financiare ndaj bizneseve që nuk respektojnë detyrimin ligjor për depozitimin e të dhënave, nisin nga 500 dollarë për rastet e mosrespektimit të afateve, për të shkuar deri në 6 mijë dollarë kur autoritetet konstatojnë se ato bëhen me qëllim për të fshehur të dhëna të rëndësishme mbi burimet financiare të pronarëve apo aksionerëve të tyre.
Ligji për pronarët përfitues ka ardhur si një rekomandim i Moneyval, strukturës europiane kundër pastrimit të parave, dhe ka qëllim zbardhjen e pronarëve të vërtetë, apo aksionerëve që qëndrojnë pas kompanive. Dhe një nga arsyet e daljes së Shqipërisë nga lista gri e pastrimit të parave, ishte edhe miratimi i këtij ligji.
Gjatë vitit 2022, numri i aplikimeve të depozituara në Qendrën Kombëtare të Biznesit ka qenë disa herë më i lartë, duke u regjistruar në afro 24.600 të tillë.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
