Luhatjet e vazhdueshme në kursin e këmbimit kanë bërë që midis Shqipërisë dhe vendeve të rajonit të shkëmbehen më shumë mallra, por me një vlerë më të ulët. Të dhënat e INSTAT të analizuara nga ScanTv, tregojnë se në muajin Shtator 2023, tregtia e jashtme me vendet e rajonit arrin në 10.8 miliardë lekë, me një rënie prej 1.9 miliardë lekësh apo 19 milionë dollarësh krahasuar me shtatorin 2022. Ndërsa nga ana tjetër, volumi i mallrave të shkëmbyera ka pësuar rritje me afro 35.6 ton.
Në analizë janë marrë shkëmbimet në vlerë dhe në sasi me Kosovën, Serbinë, Maqedoninë e Veriut, Malin e Zi dhe Bosnje Hercegovinën, ku rezulton se efektet e kursit duket se nuk kanë prekur vetëm Kosovë, pasi është i vetmi shtet me të cilin shkëmbimet në vlerë dhe në sasi janë rritur ndjeshëm në muajin Shtator, duke arritur në 4.6 miliardë lekë. Ndërsa shtetet e tjera kanë pasur një rënie sa i takon tregtisë së jashtme me vendin tonë, ku më së shumti vihet re në shkëmbimet me Serbinë, që edhe pse në sasi janë rritur, në vlerë thuajse janë përgjysmuar. Bosnje-Hercegovina renditet në vendin e fundit në rajon sa i takon shkëmbimeve tregtare me Shqipërinë.
Nëse do të analizojmë treguesit në sasi, duket që sërish vendin e parë e zë tregtia me Kosovën, më pas renditet Maqedonia e Veriut, ndjekur nga Serbia, Mali i Zi dhe Bosnje-Hercegovina. Në raport me muajin Gusht 2023, tregtia me vendet e rajonit ka pasur një rritje shumë të lehtë në vlerë dhe sasi.
Sa i takon grup mallrave më të shkëmbyera mes palëve, rezulton se me Kosovën importojmë më shumë ushqim, pije duhan dhe eksportojmë shumë materiale ndërtimi dhe metale. Me Serbinë prevalojnë në shkëmbime produktet ushqimore, ndërsa eksportojmë ndjeshëm edhe minerale, lëndë djegëse dhe energji elektrike. Me Maqedoninë e Veriut si në eksport dhe import dominon grupi minerale, lëndë djegëse dhe energji elektrike. Me Malin e Zi shkëmbejmë më së shumti materiale ndërtimi dhe metale ndërsa me Bosnje dhe Hercegovinën grupi ushqim pije duhan.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
