Zgjedhjet e 14 majit përqendruan vëmendjen jo vetëm tek procesi i votimit por edhe tek fakti se sa të shëndetshme janë bashkitë aktuale sa i takon mbledhjes së të ardhurave të tyre nga taksat dhe tarifat vendore, por nga ana tjetër janë bërë edhe parashikime mbi të ardhmen.
Sa i takon mbledhjes së të ardhurave jo të gjitha bashkitë kanë performancë pozitive, për të mos thënë që vetëm një pjesë e vogël prej tyre e administrojnë siç duhet këtë proces, ndërsa mbi 40 njësi shfaqin problematika të theksuara. ScanTv ka analizuar të dhënat e detajuara sa i takon të hyrave të pushtetit vendor në 5 vitet e fundit, ku në fakt rezulton një rritje e tyre vit pas viti.
Konkretisht rezulton se pushteti vendor ka siguruar në vitin 2018 afro 21.8 miliardë lekë, shifër e cila ka ardhur në rritje në vitin 2019i cili ka qenë edhe vit zgjedhor për bashkitë, në 23 miliardë dhe më pas ka pësuar një rënie prej 1 miliardë lekësh në 2020-ën, i cili ishte edhe viti i pandemisë. Ndërkohë në vitin 2021 vërehet një kapërcim i ndjeshëm në rritjen e të ardhurave, ku janë mbledhur 26.6 miliardë lekë dhe gjithashtu shifra ka ardhur në rritje edhe në 2022, duke u regjistruar në 27.6 miliardë lekë.
Nëse do ta krahasonim vitin 2022 me 2012, pra në një dekadë, rritja e të ardhurave rezulton me afro 155 %. Taksat kryesore që furnizon bashkitë është ajo e ndikimit në infrastrukturë, ku vetëm nga ky zë janë mbledhur 10.1 miliardë lekë gjatë 2022-shit, e ndjekur nga taksa mbi pasuritë e paluajtshme.
Por benefitet nga këto taksa nuk janë të njëjta në të gjitha bashkitë pasi varet nga numri i lejeve të ndërtimit të dhëna, nga kërkesa si dhe nga aplikimi i taksës së pronës me vlerën e tregut, metodologji që po zbatohet vetëm në Tiranë. Nga ana tjetër pushteti vendor ka të akumuluar edhe një shifër të konsiderueshme të detyrimeve të prapambetura prej afro 5.9 miliardë lekësh.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
