5 muaj para zgjedhjeve vendore disa prej bashkive në vend kanë hapur tenderat për investimet në komunitet. Shtrim-asfaltim i rrugeve, rikonstruksion i ndërtesave apo objekteve arsimore e kulturore janë disa nga tenderat e publikuar në faqen zyrtare të prokurimeve publike. Rreth 20 bashki kanë hapur tenderat në muajin dhjetor por dhe janar për investimin në mbi 75 nyje rrugore por dhe rikonstruksione të objekteve të ndryshme të domosdoshme për qytetarët.
Kryeqyteti ka tërhequr më shumë investimet mbi tendera ku veç në fund të 2022 por dhe fillim 2023 do të investohen në shtrim asflatim për nyje apo blloqe të ndryshme rrugësh, ndërtim urash në periferi për fshatrat. Gjithashtu ndërtimi dhe rikonstruksioni i shkollave dhe kopshteve janë disa prej tyre.
Të tjera bashki që kanë përzgjedhur t’u përmirësojnë disa nga kushtet qytetarëve në komunitet përpara zgjedhjeve vendore janë Kruja, Lezha, Saranda, Konispoli, Maliqi, Elbasani, Tropoja, Librazhdi, Cërriku etj. Shtrim asfaltim i rrugëve, rindërtim, rikonstruksion, shtrim me beton, rikualifikim i rrugëve janë tenderat e publikuar.
Por bashkitë zgjodhën të investojnë në fund të vitit për këtë pjesë, 5 muaj para zgjedhjeve. Nëse i referohemi të dhenave zyrtare të pasqyruara në raportin e financave vendore per 6 mujorin e parë të vitit, ajo që vihet re është se nga i gjithë fondi i shpenzuar, janë sakrifikuar punët publike, për të cilat është përdorur vetëm 17 për qind e totalit. Bashkitë përdorën rreth 83% të fondeve në dispozicion për mbulimin
e shpenzimeve korrente dhe rreth 17% të tyre për mbulimin e shpenzimeve kapitale.
Shpenzimet kapitale ose investimet, përbëjnë një zë të rëndësishëm të buxheteve vendore dhe një parakusht për zhvillim ekonomik dhe social afatgjatë. Në fund të gjashtëmujorit të pare të vitit 2022, shpenzimet kapitale të financuara me fonde të kushtëzuara shënuan një nivel prej rreth 1.3 miliardë lekë nga rreth 3.7 miliardë lekë që ishin në të njëjtën periudhë të një viti më parë.
Marinela Lina /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
