Muaji maj ka sjellë rënien e besimit të konsumatorëve por rritje të fortë të treguesit të besimit të bizneseve. Vrojtimi i treguesit të besimit të biznesve dhe konsumatorit i sapopublikuar nga Banka e Shqipërisë zbardh se Treguesi i ndjesisë ekonomike u rrit me 3.9 pikë në muajin maj, duke vijuar prirjen rritëse prej shtatë muajsh. Niveli i tij aktual (118.6) qëndron ndjeshëm (+18.6 pikë) mbi mesataren historike. Rritja e këtij treguesi, sipas Bankës së Shqipërisë, reflekton kryesisht rritjen e besimit në sektorin e shërbimeve.
Treguesi i besimit konsumator regjistroi rënie të lehtë me 0.6 pikë, pas shtatë muajsh rritjeje. Niveli i tij aktual qëndron 0.3 pikë përqindje mbi nivelin e mesatares historike. Blerjet në shuma të mëdha dhe pritjet për situatën financiare në të ardhmen u vlerësuan në rënie, ndërsa pritjet për situatën e përgjithshme ekonomike ishin më optimiste.
Ndërkaq, Treguesi i besimit në ndërtim u rrit me 5.3 pikë përqindje në muajin maj, duke shënuar edhe këtë muaj vlerën më të lartë historike. Aktualisht, niveli qëndron 34.5 pikë përqindje mbi nivelin e mesatares afatgjatë. Rritja e treguesit reflekton vlerësimet optimiste të aktivitetit aktual ndërtues dhe të nivelit të porosive aktuale. Pritjet për punësimin dhe për çmimet në të ardhmen kanë regjistruar rënie në krahasim me një muaj më parë.
Treguesi i besimit të industrisë u rrit me 2.6 pikë përqindje në muajin maj, i ndikuar pozitivisht nga vlerësimet në rritje për prodhimin aktual. Nga ana tjetër, kontratat porositëse janë vlerësuar me rënie këtë muaj. Vlera këtij treguesi aktualisht qëndron në nivelin më të lartë historik, rreth 19 pikë përqindje mbi mesataren historike. Pritjet e bizneseve të industrisë për prodhimin dhe për punësimin në të ardhmen janë në ulje. Pritjet e tyre për çmimet që do të vendosin në të ardhmen kanë mbetur pothuaj të pandryshuara nga muaji i mëparshëm.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
