Bizneset që do të ushtrojnë aktivitet në parqet teknologjike dhe shkencore do të përfitojnë lehtësi fiskale. Qeveria ka miratuar disa vendime që përcaktojnë kriteret dhe procedurat që i lehtëson sipërmarrjet nga detyrimet ndaj tatimeve. Konkretisht, në vendim thuhet që zhvilluesi, që të përfitojë lehtësirat fiskale, duhet që të ketë lidhur kontratë me institucionin përgjegjës për ndërtimin dhe administrimin e parkut. Ndërsa, bizneset qe do të operojnë në këtë park, që të përfitojnë nga lehtësirat fiskale, duhet të ketë lidhur kontratë qiraje me zhvilluesin për fillimin e aktivitetit në park, ku janë pasqyruar lehtësirat fiskale; të jetë regjistruar në Qendrën Kombëtare të Biznesit për kryerjen e aktivitetit, si përdorues i parkut teknologjik dhe shkencor; të ketë realizuar detyrimet që lindin nga kontrata e lidhur me zhvilluesin.
Çdo person fizik ose juridik, shqiptar ose i huaj, mund të paraqesë te zhvilluesi kërkesën për miratimin si përdorues për të ushtruar aktivitet brenda parkut. Kriteret që duhet të plotësojë janë : ekstrakt i regjistrit tregtar për të dhënat e subjektit, vetëdeklarim për shlyerjen detyrimeve tatimore dhe sigurimet shoqërore; vetëdeklarim që nuk është në ndjekje penale, si dhe nuk ka procese gjyqësore në lidhje me aktivitetin; vetëdeklarim që nuk është në proces falimentimi dhe kapitalet e tij nuk janë në proces ekzekutimi nga përmbaruesit; studim fizibiliteti për veprimtarinë që do të ushtrojë në park.
Lehtësitë të cilat fillojnë nga data kur zhvilluesi lidh kontratë me përdoruesin janë: Furnizimi i mallrave shqiptare të destinuara për t’u vendosur në park, të cilat do të shërbejnë për nxjerrjen e “produktit inovativ”, konsiderohen si furnizim për eksport me shkallë 0 ; Norma e tatimfitimit është 0 për 15 vite të njëpasnjëshme për ato të ardhura që gjenerohen nga aktivitetet, të cilat zhvillohen në park; Pagat e personelit që punon në kërkim-zhvillim të përdoruesit në park dhe i gjithë stafi i zhvilluesit përjashtohen nga të gjitha taksat për një periudhë 10-vjeçare; Përjashtohen nga TVSH-ja mallrat, pajisjet dhe shërbimet e përdorura në park, të cilat do të shërbejnë për nxjerrjen e “produktit inovativ”; Përjashtohen nga taksa e ndikimit në infrastrukturë; Përjashtohen nga taksa e pasurisë së paluajtshme për një periudhë 10-vjeçare për ndërtimet e realizuara në park; Kostot e trajnimit për punonjësit shkencorë dhe teknikë në park mund të rimbursohen pjesërisht nga shteti.
Sipërmarrësit, që ofrojnë dhe kryejnë shërbime ndërtimi, montimi dhe punë të ngjashme, për llogari të “përdoruesit” në park nuk përfitojnë lehtësirat fiskale. Po ashtu, mallrat, pajisjet dhe shërbimet në parqet teknologjike dhe shkencore, që nuk përdoren për nxjerrjen e “Produktit inovativ”, por janë për përdorim apo konsum përfundimtar, nuk trajtohen si të përjashtuara nga TVSH-ja. Pasuritë e paluajtshme shtetërore, që përdoren për krijimin e parkut teknologjik, merren në përdorim nga zhvilluesi për një periudhë kohore jo më pak se 20 vjet. Zhvilluesi gëzon të drejtën e dhënies me nënqira te përdoruesi të pasurive të paluajtshme.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
