Bizneset dhe konsumatorët duken më optimistë për të ardhmen e ekonomisë. Të paktën në këtë përfundim ka arritur vrojtimi i fundit i Bankës së Shqipërisë i kryer gjatë muajit prill. Treguesi i ndjesisë ekonomike regjistroi një tjetër nivel të lartë historik, duke qëndruar 14.6 pikë mbi mesataren afatgjatë, përcaktuar nga rritja e besimit në sektorët e industrisë, ndërtimit, tregtisë, si dhe nga përmirësimi i besimit konsumator.
Pritjet e bizneseve të industrisë për prodhimin dhe punësimin në të ardhmen janë rritur, ndërsa çmimet që këto biznese do të vendosin në të ardhmen nuk pritet të ndryshojnë. Treguesi i besimit në ndërtim u rrit lehtë me 0.4 pikë përqindje, duke shënuar një tjetër rekord historik, përcaktuar kryesisht nga vlerësimet më të mira për nivelin e porosive aktuale. Pritjet për punësimin dhe ato për çmimet në të ardhmen janë në rënie.
I vetmi tregues në rënie nga vrojtimi i Bankës Qendrore ka qenë ai në sektorin e shërbimeve, por që gjithsesi qëndron në intervalin e vlerave më të larta historike. Pritjet e bizneseve për kërkesën, punësimin dhe çmimet në të ardhmen janë me rënie. Bizneset e tregtisë kanë shprehur vlerësime optimiste mbi ecurinë aktuale, ku edhe pritjet për punësimin u rritën. Gjithashtu, pritjet për ecurinë e biznesit në të ardhmen dhe për punësimin kanë regjistruar rritje të lehtë këtë muaj, ndërsa pritjet për çmimet në të ardhmen u vlerësuan në rënie.
Një indikator i rëndësishëm në vrojtimin e Bankës së Shqipërisë është përceptimi i konsumatorit, që për muajin prill vijoi prirjen disamujore rritëse. Konsumatorët janë shprehur pozitivisht për situatën e përgjithshme ekonomike, atë financiare dhe blerjet në shuma të mëdha për të ardhmen. Por, nga ana tjetër, mendojnë se niveli i përgjithshëm i çmimeve dhe i punësimit në të ardhmen do të rriten.
Dorian Koça/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
